泰山終於返勝途

猪拉多纳

　　第七場三班1200米係全日出馬最少一場，只得11匹，其中「育成群駒」及「邦之星」均於上場同程取勝，另有「英勇大師」剛於谷草以超班姿態贏，表面好似三強鼎足而立；但筆者卻最睇好掛頭牌之「泰山」。

　　「泰山」自上季初出於同程輕鬆一放到底贏馬之後，又轉場、又增程，均沒有好表現，到今季復出又安排連跑兩仗賽績平平的谷草，擺明旨在熱身。今仗終於返回贏馬路程，加上出王牌兼改配騎練合作成績甚佳之田泰安，二檔起步有望照辦煮碗再一次帶到。初出馬「福嘉皇」與今日港澳盃澳門代表「福嘉旺」同主，顯然特意等今日才出，試大閘有速度，不可不防。

　　另外，第八場本地三級賽港澳盃，兩地賽駒質素有別，主隊馬匹應可控制大局，當中又以摩馬最具分量，比較上最喜歡「超皇鷹」，已連續兩屆於此盃賽上名，共獲一冠一季，可見幕後專攻此賽；事實「皇鷹」系季內尚未交代，大摩應該好心急，且看能否順利贏馬捧盃。侶「卡達聖」健康養回後可勤拼兼連場上名，三甲分子。(向東)