鳳凰讓客「勝」券在握

猪拉多纳

新帥摩力克倒戈 熟晒主隊路數

澳職周一獨腳戲由墨爾本勝利主場迎戰威靈頓鳳凰，主隊上周宣布換帥，改由名宿梅斯卡特接手領軍，難免會影響球員集中力。鳳凰雖然一向作客墨爾本成績麻麻，不過佢哋有新帥摩力克同中場指揮官靴南迪斯齊齊倒戈求打爭氣波，呢對老拍檔勝在經驗豐富同埋熟晒勝利路數，當然有力偷雞搶分，勝利讓一球，力奇捧2.4倍「讓客」！

（有線64周一下午4:30直播）
鳳凰中場靴南迪斯有卡士

勝利上周用一場勝仗告別主帥普斯迪高路，後者離隊走去接掌澳洲國家隊，取代佢嘅則係佢嘅副手梅斯卡特。現年40歲嘅梅斯卡特係勝利名將，球員時代曾經協助勝利兩奪澳職總冠軍，佢之前跟住普斯迪高路工作咗成18個月咁耐，當然熟悉球隊運作，只係話晒新官上任，又點會肯乜都唔變，加上陣內唔少球員以前都係同佢做隊友，依家肯唔肯聽梅斯卡特支笛都好難講。

另邊廂，前香港隊總教練摩力克今季回歸澳職做鳳凰新教頭，查實摩帥喺澳職個朵響到爆燈，梅斯卡特當年兩奪冠軍就係跟住佢搵食，甚至梅斯卡特球員生涯首演都係要多得摩力克畀機會佢，所以話摩力克唔止熟晒勝利路數，梅斯卡特有幾多料佢又點會唔知！

另一個鳳凰倒戈兵，就係09年協助勝利贏澳職總冠軍嘅哥斯達黎加中場靴南迪斯，佢上季去咗印度搵食，依家又再回歸澳職，以佢技術喺澳職的確超班，仲有要打爭氣波省招牌嘅決心，今鋪隨時發揮小宇宙踢高幾皮波。就算話睇往績，鳳凰對上6次出戰勝利輸晒，今晚睇落都有本錢反彈威番鋪。