伊巴謙Fit爆PSG「聖」券在握

猪拉多纳

要數近排邊位球員最搶眼，點可以唔提巴黎聖日耳門（PSG）射手伊巴謙莫域？呢位前鋒今個月踢咗5場球會連國家隊賽事一共轟入10球，連「蠍子擺尾」、「衝力射球」呢啲絕技都出齊晒，就知佢狀態Fit到爆啦，明晨PSG由佢掛帥作客聖伊天，讓半一都冇有怕，撐2.08倍上盤。

（now818台、TVB13周一凌晨4:00直播）
柏斯托尼缺陣影響不大

PSG法甲開季連和兩場之後，極速搵番勝利方程式，喺之後11場比賽攞到10勝1和佳績，氣勢一時無兩。佢哋上周更趁住摩納哥失分登上法甲榜首，張櫈都未坐暖，梗係唔想咁快就畀人搶走個「一哥」位，鬥心毋庸置疑。季初有人質疑兩大射手卡雲尼同伊巴謙莫域未必合拍得嚟，呢對箭頭就用實際行動粉碎球迷疑慮，近兩場比賽合作派出9隻光蛋，就算中場柏斯托尼唔踢得，都足夠殺敗對手。
聖伊天近5戰場場失兩粒

聖伊天上仗雖然砌低羅連安特中止4場不勝頹勢，可惜佢哋後防甩漏甚多，連續5場聯賽都失兩球，今次對住PSG嘅恐怖鋒線試問點頂？加上一對守將波格巴、保羅拜斯繼續休戰，相信好難阻止PSG取得作客7連勝。