梁家俊復出妙勝碧玉釵

猪拉多纳

本地薑梁家俊尋日停賽刑滿復出，雖然只係得四隻馬跑，但一樣有佳作，佢喺第五場四班草地千八米賽事，騎師傅蘇保羅嘅「碧玉釵」喺直路左穿右插，後上擒低「綠豆爽」同埋「多豐裕」，復出即刻有馬贏兼打破逾一個月嘅頭馬荒，亦係佢兩師徒今季合作嘅第二W。
       
碧玉釵左穿右插贏得精彩。
蘇保羅讚馬主有耐性

蘇保羅賽後話「碧玉釵」尋日可以順利贏馬，除咗梁家俊騎得好，馬主吳彥男有耐性都係關鍵，事關呢隻馬舊年六月試過左前腿肌腱受傷，好彩吳生肯畀足時間，等佢可以養返好隻馬，今季復出第二鋪就建功，佢都好開心。
       
碧玉釵台前幕後互相道賀。

蘇保羅仲話「碧玉釵」上季尾已經愈跑愈好，依家健康冇問題，評分仲有得再上，遲啲就算增程跑二千甚至二千二都冇問題，谷草一樣可應付，部署夠晒彈性。