火辣神駒兩捷插班

猪拉多纳

踏入七月季尾階段，本地倉口呂健威頻頻搏殺，之前兩個賽日已經擸咗３Ｗ，尋日威哥繼續出擊，甫開場就靠匆匆再出嘅新馬「火辣神駒」建功，連續三次賽事都有馬贏，旺氣逼人。另外，「火辣神駒」亦都連贏兩場新馬賽，繼之前嘅「崇山寶」後做咗今季第二隻贏夠兩Ｗ插班嘅新馬。
       
火辣神駒打疊贏馬表現出色。

啱啱上個禮拜先至喺新馬一千米直路賽開齋嘅「火辣神駒」，尋日相隔一個禮拜跑長四百米兼且孭多七磅，但依然被捧到一面倒大熱，結果呢隻兩歲馬喇士力抗三歲嘅「奪目商人」再下一城，認真犀利。
       
呂健威
下季前景樂觀

賽後呂健威都話「火辣神駒」今次再贏多場嘅難度都唔細，但佢話既然只係對住新馬兼狀態又好，先至諗住打鐵趁熱嚟多鋪，結果部署得手，佢覺得呢隻馬鬥心好好，前景都唔錯，下季會由短跑起，應該可以取得到好成績。