对上两期都有马赢 吴嘉晋骑出信心

猪拉多纳

　　见习骑师吴嘉晋，出道初期笑容可掬，令外界容易接受。师承红裤子出身嘅叶楚航，教得佢基本礼仪好好，起码唔係木口木面，对住镜头经常未瞓醒，广告都有话：「笑一笑，世界更美妙」。

　　但作为骑师，终归要攞出成绩，任你係四万常掛在面上又点，搏亲都输、落飞唔赢、成日守斋的话，渐渐唔会被外界接受，所以，小伙子紮稳根基，唔好学坏係重要，成绩方面亦唔代表唔紧要。

　　吴嘉晋对上两期均有马赢，比赛时似係有番信心，又或者支持佢嘅幾个马房，弹到啲好牌畀佢，因为未赢最近两W之前，对上一匹已经係4月头「欢乐宝宝」，而再之前成绩亦冇厘特别。所以，近两场头马的确重要，起码振奋到自己士气。

　　今晚吴嘉晋有4匹坐骑，独得一匹外线马「钱程万里」，其他都来自师父马房，此为「友情友义」、「渐信良驹」及「珠光宝气」。

　　呢数驹之中，季内佢跑得最好係「渐信良驹」，不过，已经累积一定成绩，唔再易有突破，反而，「友情友义」和「珠光宝气」，最近在晋仔手上跑得好，今仗再跑相同路程，由於未交代，点会唔搏命。      

Jack