添多福五升四再贏

猪拉多纳

要一隻馬五班贏完，升上四班即刻冧莊贏多鋪，絕對唔係容易嘅事，不過呢個高難度動作，李易達今季就完成咗兩次。繼季初嘅「愛拚者勝」升番上四班取得連捷之後，尋日李易達重演歷史，旗下「添多福」閘前獨贏雖然由唔夠四倍，回飛到五點一倍，但最終都順利喺楊明綸胯下贏咗呢場四班千六米，升班即刻再贏。
  
添多福（左）前仗贏馬水準高，昨日五升四再下一城。


落腳慢嘗試增程


不過，李易達賽後就話呢場贏得相當驚險，拉士二百米以為追唔到，好在賽前因應四班步速會較快，一早吩咐徒弟楊明綸盡量擺前走，果然真係搞得掂，而贏完呢場後，達哥就話隻馬嘅落腳愈來愈慢，睇嚟都會嘗試吓增程發展，評分應該仲有得反彈。