科特迪瓦橫行霸「道」

猪拉多纳

04/02/2012
文： 亨格比利

非國盃8強今晚開戰，奪標熱門科特迪瓦會同東道主之一嘅赤道畿內亞正面交鋒。「大象」晉級過程不費吹灰之力，領隊沙侯爾上場用二線兵都照贏安哥拉，3戰全勝，今晚一眾主力叉足電復任正選，睇怕赤道畿內亞都係時候Game Over，1.95倍「讓球客勝」要捧場。（now676台周日凌晨3:00直播）




屆屆都畀人叫做熱門，偏偏科特迪瓦就不斷令球迷失望，對上3屆非國盃都空手而回。不過一眾「大象」球星今屆終於痛定思痛，鬥志不知幾咁旺盛，中場耶耶托尼話如果今次捧唔到盃，會係畢生嘅遺憾，防中迪奧迪仲叫紐卡素咪期望佢會提早歸隊，擺明對爭標信心十足。


上仗用9件後備照贏2粒


事實上，科特迪瓦咁大口氣梗有原因嘅，事關呢支非洲第一勢力踢咗B組兩場分組賽，就已經篤定出線，主帥沙侯爾喺尾輪玩輪換，勢估唔到佢老人家玩到咁大，竟然收起9位主將，只係安排班巴同高路托尼一對常規中堅擔正，但依然清風送爽，贈安哥拉兩蛋，主力後備都咁勁，實力明顯超晒班。


赤道畿內亞自認唔夠砌


東道主赤道畿內亞喺頭兩輪A組分組賽都係臨尾奠勝，奈何上仗輸畀贊比亞，拱手讓出首名出線資格，搞到要淪為次名出線，硬撼大熱門科特迪瓦。陣中最好打嗰件前皇馬翼鋒巴保亞都講過，咁早撞到「大象」真係好大機會出局，擺明淆晒底。查實好難怪巴保亞嘅，杜奧巴、謝雲奴同迪奧迪等科特迪瓦主將今晚悉數復任正選，沙洛文卡勞又話傷愈候命，粒粒皆星，赤道畿內亞想偷雞？怕且破到蛋都要還神咯！


非國盃賽制 :


今輪為8強戰，以一場過分勝負，若法定時間內打成平手，則需加時30分鐘作賽，再和則互射12碼決勝。