沙維出口術向球證施壓

猪拉多纳

18/01/2012


今晚嘅皇、巴大戰原來已經係近9個月來第8場國家打吡，但對於皇馬門神卡斯拿斯同巴塞發電機沙維嚟講就仲誇張，今仗係佢哋兩個人之間歷來第28次對決，難怪「聖卡斯」賽前都話踢到厭啦！


兩人鬥足27次 沙維佔優


連埋西盃8強次回合同今年4月聯賽次循環，皇、巴會喺1年內鬥足10次，一旦佢哋喺歐聯又齊齊晉級抽中對方，更可能將交手次數推高到12次。皇家大佬「聖卡斯」就咁話嘞：「舊年12日對4次，當時大家都覺得好新鮮，不過老實講，依家真係有啲悶。」




翻查數據，唔計今晚，原來卡斯拿斯同沙維已經交手過27次，雖然沙維以12勝7和8負稍微佔優，但今次火併之前，沙維慌住唔夠穩陣，賽前向球證施壓：「其實今季我哋受球證誤判拖累嘅情況較以往多，我只係講事實，無論如何我哋都會努力踢波。」《世界體育報》就此列出咗一個得意數據，就係巴塞歷來108次造訪巴拿貝，只係獲判5個12碼，反而銀河艦隊就有成22個，差咁遠，難怪沙維要出口術啦！