巴塞就住踢入波唔慌多

猪拉多纳

04/01/2012
文： 走肖

西班牙盃16強首回合巴塞隆拿喺主場對奧沙辛拿，驟眼睇係大炒格，實情巴塞連隊長佩奧爾傷埋，加上要留力打吡戰對付愛斯賓奴，入球大細中位數開3.5球，不如冷敲2倍入球細。（now632台周四清晨5:00直播）


奧沙近7戰未失多過1球


韋拿重傷已經黑仔，但巴塞嘅噩夢仲未完，放假前有恩尼斯達喺西班牙盃整親好彩冇大礙，佩奧爾最近又喺熱身賽受傷，假如巴塞再有球員賴嘢，教練哥迪奧拿隨時嗌救命，唔怪得佢call咗7個B隊細路應付呢場盃賽，擺明就唔想嘥啲主力彈藥。仲有呀，上一圈巴塞對丙組仔賀斯比圖勒，首回合作客都只係贏1:0咁大把，大炒唔係必然。




再講，巴塞王牌美斯獲得教練哥迪奧拿特別放多4日假，前日至歸隊，其他南美兵包括馬斯真蘭奴等搭完長途機探親，未必咁快可以回復100%狀態。對家奧沙辛拿近7場有4勝3和徹底翻生，期間未試過單場失多過1球，季初喺聯賽淨吞巴塞8蛋嘅場面，應該唔會再出現。