紐卡素 曼聯射手「大」晒冷

猪拉多纳

04/01/2012
文： 阿占

紐卡素同曼聯喺舊年最後一戰齊齊輸波，今晚兩支哀兵相遇，肯定「大」打出手博翻身！主場出擊嘅紐卡素有弗爆嘅丹巴巴亞掛帥，紅魔亦有貝碧托夫同朗尼擔正，Goal手鬥法，捧1.75倍入球大係最明智選擇！（有線200、300及廣東體育周四凌晨4:00直播）




本來曼聯喺2011年年尾個勢好勁，點知除夕夜無啦啦輸畀布力般流浪2:3，班波防守不穩嘅問題再次表露無遺，中堅菲爾鍾斯、門將迪基亞等守將輪流出洋相，呢班新星時龍時蟲，實在令人擔心。尤其係喺咁緊密嘅賽程下，班新人信心受損，邊有咁快回得切氣吖，今鋪作客出擊，畀人噓兩噓隨時再添壓力，想保住清白之身都幾難。


朗尼復出「Hea碧」翻生


好彩，曼聯雖然防線唔掂，但班前鋒都總算爭氣，「Hea碧」貝碧托夫走出雪櫃後近3場波入咗6球，腳風夠晒順之餘，阿占見佢呢幾場波都好肯走，態度冇以前咁Hea咁衰，睇嚟佢都痛定思痛想做番啲成績。至於上仗因夜蒲得罪費Sir而被罰內部停賽嘅朗尼，早兩日道歉後已獲爵爺原諒，今鋪肯定會復出搏殺，有傳媒仲話佢或者會擔任後上殺手，支援「Hea碧」同「小豌豆」攻堅，紅魔鋒力夠晒保證。


丹巴巴亞今季勁入14球


對家紐卡素開季係威係勢，不過近排就「打回原形」，近8場聯賽贏得1場咁大把，搞成咁，全因「喜鵲」條防線亦係甩漏多多，中堅史提芬泰萊養傷後，連帶佢位拍檔高洛仙尼都走晒樣，近6場聯賽有4戰畀對手攻入3球或以上，咁嘅豆腐防線面對曼聯3大殺手，邊有可能唔失波吖！「喜鵲」陣中叫做可靠啲嘅球員，就係射手丹巴巴亞同進攻中場賓艾化。佢兩位老哥包辦晒紐卡素近個幾月所有入球，丹巴巴亞仲癲到開季至今有14球進帳，穩坐射手榜二哥位，有佢壓陣，唔愁冇波入啦！兩軍都係攻強守弱，捧「入球大」分分鐘未到半場已Confirm收錢！


橫數千軍


 紐卡素巴亞射手榜2哥




‧近8戰1勝2和5負，當中只得2場食白果。

‧丹巴巴亞以14球排射手榜第2。

 曼聯近6戰5鋪開大

‧近8戰5勝1和2負，對上6場有5仗開大。

‧近6次交手得3勝3和。

頂占筍盤：紐卡素（入球大）

有線球彩台主持阿占

電郵：soccer64@cabletv.com.hk

PHONE波熱線：1831 678

「球彩俱樂部」開放時間：周三晚10:30至11:45