FC東京天皇出鞘

猪拉多纳

01/01/2012
文： Wendy

如果早前開聖誕Party時，有兩個唔多熟嘅人不請自來，點都會有啲唔高興同唔自在！依家遠在東瀛足球界就有差唔多嘅事發生，天皇盃決賽兩支球隊居然都係乙組仔，係呢個盃91年歷史以來嘅首次！今午兩軍於東京國立競技場決戰，秤先有「半個主場」嘅FC東京客勝。（有線61及201台周日下午1時直播）




明明大家都估決賽係橫濱水手對大阪櫻花時，點知四強一齊畀FC東京同京都不死鳥踢出局。好好哋一個咁重要嘅盃賽，決賽居然係兩支乙組「京京決戰」，班日職大佬真係幾冇面！




雖然FC東京只係首次踢入天皇盃決賽，佢哋喺日乙以極大差距稱霸，只要踢埋今日決賽，休息多一陣，就能以日職球隊身份等J-League開鑼。


不死鳥踢完加時好輸蝕


FC東京喺上個月收爐嘅日乙出晒名入波多，兩位巴西前鋒盧卡斯施維連奴同羅拔圖施薩都貢獻良多，尤其是盧卡斯施維連奴弗到漏油，今日隨時有士哥。




被編成「主隊」嘅京都不死鳥，現時陣中最引人期待就係前鋒久保裕也，呢個後生仔啱啱滿18歲，但喺上季日乙已經射入十球，早前又曾經去過德國試訓，話唔定踢埋今場，過幾個月已經轉會日職球隊。


日乙交手兩炒不死鳥


雖然不死鳥同樣都係三日前踢四強，但佢哋就要踢足120分鐘，先爆冷晉級！唔好睇小呢個加時，球員運動量大咗咁多，得咁少時間休息，今日下午就要踢決賽，體能上好輸蝕。上季日乙雙方兩次對賽，無論主客，不死鳥都畀東京大炒，兩軍實力始終差一班，客勝應能開出。

近5屆天皇盃決賽戰果

2011 鹿島鹿角2:1（1:0）清水心跳

2010 大阪飛腳4:1（1:1）名古屋鯨魚

2009 大阪飛腳0:0（0:0）柏雷素爾

加時飛腳勝1:0

2008 鹿島鹿角2:0（1:0）廣島三箭

2007 浦和紅鑽1:0（0:0）大阪飛腳

球彩全女打

熱愛舞蹈的Wendy，04年歐國盃Euro Babe變身成有線球彩台節目主持，當初對足球猶如混沌初開，依家已滾瓜爛熟，最愛暢談波經。

phone波熱線：1831 678

電郵：soccer64@cabletv.com.hk

球彩俱樂部開放時間：晚上10:30至11:45