曼聯英聯盃搵沙包出氣

猪拉多纳

25/10/2011
文： 樂比堅尼

英格蘭聯賽盃十六強戰，今晚先上演四場，重頭戲曼聯作客乙組仔艾迪索特，即使預計曼聯會派部分後備落場，仍可照捧大盤，事關曼聯班後備極具級數，餓波咁耐肯定加多幾錢肉緊，加上曼市打吡戰剛慘敗，仲唔乘機搵對手祭旗一吐烏氣？




（now 638周三凌晨2時45分直播）




曼聯上圈作客三比○大破英冠列斯聯，一班後備踢來龍精虎猛，好似梅開二度嘅奧雲平時冇乜機會落場，一有機會擔正特別起勁，今次對住乙組仔可謂啱晒佢發揮，而其他大牌球星好似卡域克、傑斯、朴智星及路爾斯華倫西亞，今季上陣機會大減，亦需要聯賽盃呢啲場合催谷番狀態。


艾迪索特主場冇威勢


事實上，費格遜近年提拔新人，一班具經驗球員反而屈居後備，間接令佢哋踢聯賽盃實力大增，睇番近幾季成績，曼聯除上屆於八強出局，○六、○九同一○年五屆內曾三奪冠軍，如果話佢哋係聯賽盃之王亦不為過，以艾迪索特實力，難對紅魔鬼構成威脅。




艾迪索特主場成績冇作客咁好，今季聯賽五場勝仗有四場來自作客，所以曼聯驚都未驚過！