曼城爭做3哥再o趙史篤城

港陌

17/05/2011
文： 朱楓

大家冇睇錯，今晚曼城又會喺英超主場對史篤城！「藍軍」上周六雖捧走足總盃，但文仙尼賽後仍下禁酒令，決心今晚要贏波搶阿仙奴三哥位，戰意好到爆，加上泰維斯開腔表示有意留隊，今仗再對手下敗將史篤城，絕對有力乘勢再落對手面，「讓球主勝」有2.1倍值捧！（有線201、301及廣東體育周三凌晨2:45直播）




曼城喺剛過去嘅周末終於苦盡甘來，喺英總決賽以1:0擊敗史篤城，取得球會近35年首個重要錦標，賽後入波功臣耶耶托尼話感覺好似夢想成真一樣。本來以英國人慣性，呢個咁開心嘅時刻，賽後班球員應該會飲番兩杯慶祝，不過領隊文仙尼竟下禁酒令，呼籲球員唔好分心，目標今晚對史篤城全取3分。


泰維斯轉軚有意留隊


雖然曼城上場贏熱刺後，已經鎖定下屆歐聯資格，但由於阿仙奴啱啱倒灶輸波，如果曼城今晚攞晒3分，將以1分反壓阿仙奴升上第三。須知英超第三係直接參加歐聯分組賽，相反第四要打外圍賽，隨時遇到拜仁同維拉利爾等強隊，相差咁大，你話曼城今晚點會唔搏？再加上近期傳下季會過檔國米嘅泰維斯，喺捧盃後轉軚表示有意留隊，應該可以刺激軍心。




其實以史篤城今季嘅表現，上場英總對曼城唔係冇得打，不過唔知係咪因為太過緊張，最後表現差強人意。賽後左翼艾法寧頓仲話呢場失利，比佢06年効力韋斯咸喺英總決賽輸畀利物浦嘅感覺仲要差，可想而知對佢哋有幾大打擊。




睇番史篤城目前排第9，護級唔輪到佢哋，仲要因為攞足總盃亞軍，連歐霸席位都到埋手，根本冇戰意可言，作客曼城輸兩粒隨時係最低消費。