帕爾馬祖記唔齊腳冇攻細

猪拉多纳

15/05/2011
文： 安高

意甲今晚由帕爾馬主場對祖雲達斯之戰，安高擔心會係一場悶戰，事關主隊今仗會有近況當勇嘅射手阿馬利因借用條例唔落得場，撞正祖記又有傷停問題，雙方入波各有難題，今仗梗係捧2.1倍「入球細」好過啦！（now633台周日晚9:00直播）




近4場聯賽3勝1和嘅帕爾馬，家陣多過護級安全線6分，基本上已經安全。球隊難得谷起狀態，唔通今仗會放軟手腳任你砌咩？安高對佢哋防線尤其有信心，近4戰僅失1球，主場對住國際米蘭都可以冇失波，唔係嘢小架！


阿馬利唔踢得卡錫停賽


進攻方面，帕爾馬本由基奧雲高同阿馬利構成組織軸心，不過阿馬利唔落得場，影響都咪話唔小。佢下半季加盟踢11場入7球，威脅力大，冇咗佢之後，無論落基斯普、簡達華定保積洛夫都肯定差一截，未必入到波架！




另邊廂，隨住上周大好形勢下畀基爾禾逼和之後，祖記爭逐歐霸盃席位機會又再落入下風。安高唔擔心佢哋唔搏命，問題係想搏都有心無力。睇番佢哋條中場線，卡錫同馬治斯奧齊齊停賽，施素高有傷肯定唔踢得，阿古蘭尼日前操練傷出，加上佐治馬天尼斯都係上陣成疑，消息話主帥迪尼利可能焗派新人基安東尼圖落場拍住菲臘比美路算數，創造力難免大減，班前鋒識飛都冇用啦！