雙韋護級戰和波當輸

猪拉多纳

15/05/2011
文： 江忠德

韋根主場對韋斯咸呢場英超護級生死戰，兩隊一定搏老命搶分，因為依家落咗去英冠好難翻到身返上英超，大家孤注一擲進攻會搞到防守大亂，暴露更多缺口，隨時出現大手交易。




韋根喺英超混咗多年，堪稱護級專家，啱啱成功悶和阿士東維拉士氣高昂，姑勿論上仗和波賽果合唔合理，總之領隊馬天尼斯帶領下嘅韋根，喺主場唔太失禮，將士用命搵番自己嘅小宇宙，呢場一開波就無得留手。


焗住駁火後防大開


以韋斯咸嘅人腳冇諗過會淪落到榜尾，領隊格蘭一向保守，一直靠防守同對手死過，但係季中擴軍搵咗貴價貨羅比堅尼、丹巴巴亞後，格蘭諗住前線有大把人用，入球能力有保證，改踢進攻足球，連對曼聯、利物浦同曼城都入波，呢場對韋根使乜怕前面搵唔到食。




可惜「錘仔幫」條豆腐渣防線一樣都唔掂，近6場勁失15球，兩隊都知道今場踢和同輸波冇分別，到呢個關鍵時刻只有勇往直前，肯定喪攻唔使本。