多蒙特捧沙律碟請食德國大餐

港陌

14/05/2011
文： 朱楓

今日《是日正菜》朱楓會為大家炮製一道德國大餐，雖然多蒙特已經提早封王，但今晚最後一次喺主場比賽，相信會努力爭士哥答謝球迷，何況仲有「極品壽司」復出，只係考慮作客嘅法蘭克福亦要爭分護級，既然兩軍各有所需，1.48倍「入球大」大啖食都唔怕滯啦！（有線64周六晚9:30直播）




已提早兩周封王嘅多蒙特，上仗果然分心，作客以0:2不敵雲達不來梅，但朱楓相信「蜜蜂兵團」今晚表現會有改善，事關呢場係佢哋今季最後一場主場比賽，肯定會打場好波答謝一班球迷嘅支持，更何況賽後仲會正式獲頒俗稱「沙律碟」嘅冠軍盾，相信今場就算差啲爭勝決心，都唔會連蛋都破唔到咁瘀啩？




事實上，多蒙特今場陣容極之完整，就連日本中場香川真司都已經復操兩課，今晚好大機會傷愈後首次披甲，等呢件「極品壽司」可以熱一熱身，為3日後喺杜伊斯堡對日本旅歐球員選手隊嘅籌款賽做好準備，再加上正養緊傷嘅中場紐尼沙軒過埋今場之後，就會過檔皇馬，相信多蒙特一眾戰將都會爭取士哥歡送呢位新星。


新帥達姆專剋多蒙特


但講到底，朱楓都係覺得今場入球大抵玩過多蒙特主W，事關多蒙特今場對手法蘭克福目前護級形勢非常嚴峻，落後禾夫斯堡同慕遜加柏1分排尾2，今場至少要保持不敗先有機會成功護級，肯定會全力爭取士哥。更值得留意係，法蘭克福係目前德甲除賀芬咸外，今季未輸過畀多蒙特嘅球隊，新教練達姆更係多蒙特剋星，以往喺德甲曾23次帶隊贏多蒙特，係目前德甲教練中「冧巴溫」，個績咁靚真係唔到你唔驚！


是日推介


多蒙特




（入球大）1.48倍

慕遜加柏

（客勝）2.30倍

拉素

（讓球和）3.30倍