史篤城爆廠提醒咗曼城

港陌

14/05/2011
文： 江忠德

用金錢堆砌而成嘅曼城，終於得到回報，夢想成真攞到下屆歐聯入場券，依家又同史篤城踢足總盃決賽，爭取近35年首個冠軍。以曼城點多面廣嘅中前場攻擊組合，多得對方「提醒」，穩中求勝，未必急於喺90分鐘攻陷史篤城。


野獸復出實搏命


曼城班主文梳亞呢兩季落重本，就係想捧盃攞威咁簡單，呢種即時快感實際過要等到下季踢歐聯，兼且曼城呢班大佬身經百戰精過鬼，知道每逢季尾一定要「晒冷」，先至可以吊高嚟賣，今場實唔錫身大演真功夫！




曼城砌低熱刺點到即止，文仙尼冇亂用彈藥，泰維斯喺關鍵時候復出，睇見佢受到全場近５萬球迷起立鼓掌，文仙尼呢場邊夠膽唔用佢！呢位阿根廷殺手餓波咁耐，相信好快會搵番比賽感覺，同隊友創造入波機會，或者自己博12碼都唔奇。




史篤城剛剛力克阿仙奴確係提升咗士氣，但領隊佩尼斯呢步棋行錯喇，反而提醒曼城小心重演伯明翰聯賽盃爆冷嘅奇迹。踢決賽最緊要控制節奏，而史篤城傳球成功率係英超最低，體力清耗大，比賽時間愈長，有咗戒心嘅曼城就可恃質凌人！




足總盃決賽賽制：以一場定勝負，法定時間賽和需加時作賽30分鐘，再和則互射12碼決勝負。