廣山望：小心巴拉圭發窮惡

港陌

29/06/2010

日本國家隊以防守足球打入16強，今晚佢哋面對防守力強嘅巴拉圭，隨時要互射12碼分勝負，據聞日本領隊岡田武史安排好5個負責主射嘅球員，人氣爆燈嘅本田圭佑當然有份，最令Fans安慰嘅，係被打入冷宮嘅中村俊輔都榜上有名，即係話，岡田考慮畀佢後備上陣做秘密武器。

歐洲7會垂涎松井大輔

據聞日本喺世盃開幕前，已收集意大利同巴拉圭嘅資料，佢哋抵達比勒陀尼亞備戰後，安排本田圭佑、大久保嘉人（上圖中）、遠藤保仁、田中鬪莉王同中村俊輔進行12碼特訓，岡田武史話：「我哋同世界強隊有距離，所以最後嘅作戰方案好重要。」言下之意，即係同巴拉圭鬥守。


同時，近期日本國腳變搶手貨，効力格勒諾布爾嘅中場松井大輔，吸引到科隆、史特加、華倫西恩斯、拉科、新升上意甲嘅布雷西亞、烏超基輔阿仙奴同俄超蘇比托夫7間球會嘅注意，相比起部分巴拉圭球員，佢可能幸福好多。曾經到巴拉圭落班嘅前日本國腳廣山望（圓圖）話，當地部分國家隊成員，月薪低到得10萬日圓（約8,700港元），所以佢哋會唔要命咁爭入波，嗌日本球員小心。