英軍出厄遜注定逢厄運

港陌

29/06/2010
文： 黃興桂

經過九十分鐘比賽，勝利者又是德國人！英格蘭又再臣服於德國腳下，好多人都賴球證誤判林柏特嘅世紀問題球，但呢個只係原因之一，另一個原因係中堅厄遜，呢場波好明顯係輸厄遜！

德國新星上位因禍得福

年屆卅一歲嘅韋斯咸中堅厄遜除咗個「厄」字唔吉利之外，球場上亦成為英格蘭防線上嘅「黑洞」，究其原因，厄遜係左腳球員，並不擅用右腳，Peter教波，都唔會用一隻腳「生蟲」嘅球員打中堅。可惜英格蘭今勻真係行衰運，里奧費迪南練波受傷，京治又冇埋，搞到英德大戰要搵厄遜頂硬上，真係唔知邊個累邊個！


個波入咗當唔入，國際足協又要考慮吓用唔用新科技輔助執法，但值得留意嘅係德國今場表現，幾位青年軍奧斯爾、湯馬士梅拿等在世盃頻頻立功，成功上位，令到開賽前波歷克因傷缺席決賽周嘅陰霾盡去，真可謂「因禍得福」，英文為Blessing in disguise。


與影星元彪一起睇波，佢點出德國致勝之道，就係「拳怕少壯」，體育競技同打功夫一樣，老咗、鈍咗、慢咗，係冇得呃人，英德大戰亦有呢個現象，英格蘭球員雖然經驗好，但唔及德國年輕力壯，最終德國勝出。

「雙牙會」秤先西班牙

今晚Peter將會評述「雙牙會」，西班牙首戰不敵瑞士後痛定思痛，球員表現回復水準，論實力足可戰勝葡萄牙，西班牙W可捧。

今日醒你

「英格蘭今屆有的是運，不過係厄運，厄遜嗰個厄！」66年世盃奪冠以來，英格蘭一直被詛咒，幾乎每次對德國都遇上厄運，今場對德國焗用厄遜，入球被球證扼殺，投注英軍如同被呃錢！