日本球星吔出真性情

港陌

29/06/2010

日本人喜歡食魚生及壽司，同時呢個大和民族又鍾意搞搞震，所以有好多古靈精怪分析同調查，其中一個研究就係鍾意食邊款壽司，從中反映你嘅性格特徵。鍾意食海膽壽司嘅本田圭佑，原來擁有自視甚高、遇強愈強、不願被人控制嘅性格，聽落真係好準喎，大家又不妨睇吓自己同邊個球星相似！

本田圭佑豪爽領袖

喜歡壽司：海膽壽司


性格分析：


領袖型、能力型、挑戰者、權威型，擁有很多當領袖的特質，豪爽、不拘小節、自視甚高、遇強愈強，身上流露一種其他人冇嘅魅力，令到身邊人妒忌。但由於比較好勝，有時候會對人帶點攻擊性，讓人感到壓力。


現實情況：


本田今屆世界盃八面玲瓏，確係有做領袖嘅魅力，佢又一早畀人話唔睬隊友，聽落都分析得幾啱。

遠藤保仁實事求是

喜歡壽司：玉子壽司

性格分析：

和平使者，善解人意、隨和，容易了解別人，但唔係太清楚自己想要乜嘢，會顯得優柔寡斷。一個與世無爭嘅人，凡事都不愛與人競爭，亦不求知名度，即使十分能幹，但只會選擇低調。

現實情況：

○ 九年亞洲足球先生實力毋庸置疑，但佢唔同本田圭佑爭位，與世無爭，任由領隊岡田武史安排踢法及位置。

阿部勇樹呆板怕醜

喜歡壽司：魷魚壽司

性格分析：為人呆板保守，做事一成不變、墨守成規，討厭變化多端嘅工作，對人對事都唔會偏心，大公無私，性格相當害羞，缺乏勇氣認識新朋友，對事情的固執程度讓身邊人卻步。

現實情況：

阿部踢波最叻就係「話唔出就唔出」，死守後面掃波，唔會上前助攻，千祈咪叫佢做咁多嘢！

中澤佑二衰在老實

喜歡壽司：鰻魚壽司

性格分析：

為人踏實穩定，畀人忠實可靠嘅感覺，不過有時做事過於顧慮，導致好多問題不能彈性解決，做決定亦過於審慎，往往讓機會溜走，隨即後悔不已。

現實情況：

中澤係主力後衞，踢法硬淨又穩陣，好多時都能當機立斷，做出最好決定。

長友佑都冇料跟風

喜歡壽司：三文魚壽司

性格分析：

冇主見，做事愛好「跟風」，當眼前出現困難的時候，就會變得不知所措、六神無主。但另一方面，對身邊事物擁有十分敏銳的觸覺，往往比別人更快察覺到危機的出現。

現實情況：

隨住本田圭佑喺隊中愈嚟愈紅，長友由原本嘅中村俊輔派加入本田派，知道中村唔掂，即刻跟本田做大佬。

其他壽司睇性格

吞拿魚壽司：腦筋清醒、沉實陰險

加州卷：精力充沛、快樂主義

油甘魚壽司：自命高貴、不擅理財

三文魚子軍艦：懂得享受、錢字行頭

蟹柳壽司：為人隨和、不修邊幅

帶子壽司：沉實內斂、深藏不露