西班牙嘜實C朗斷葡軍龍脈

港陌

29/06/2010
文： 法比加輝

世界盃十六強最後一仗上演「雙牙會」，西班牙大戰鄰國葡萄牙。西班牙受過首戰不敵瑞士嘅教訓後，球員明顯集中番，上兩場分組賽均踢出應有水準，射手韋拿更加弗到無懈可擊！至於葡萄牙整體質素始終不及對手，只懂依賴隊長C 朗拿度，可惜佢唔係葉問，好難一個揪十一個，加輝今場推介西班牙主勝畀大家。 （有線61台周三凌晨2時30分直播）

回復地上最強本色

西班牙出閘脫腳都算因禍得福，事關輸波令一班被捧為「地上最強」嘅球員獲得當頭棒喝，且亦讓世界盃初哥領隊迪保斯基上咗寶貴一課，有空間修正過失，結果西班牙往後兩場分組賽踢得炯炯有神，似番○八年嗰支歐國盃冠軍。


今場嘅勝負關鍵，個人認為在C 朗拿度身上，無疑C 朗屬葡萄牙進攻命脈，上腳靠佢、組織靠佢、突破靠佢、入波當然都係靠佢，因此只要凍結到呢位全球身價最高球員，就等同廢咗葡萄牙武功一樣。或許有人認為，葡萄牙喺今屆賽事曾大炒北韓七球，當中C 朗嘅貢獻並唔算最多，但要知道該場對手只係北韓，根本畀唔到壓力葡萄牙，其他隊員踢出水準亦屬意料中事。

布斯基斯做吊靴鬼

西班牙領隊迪保斯基賽前已表明，諗好方法對付C 朗，最大機會係搵活力充沛嘅防中布斯基斯全場好似吊靴鬼咁嘜實佢。事實上C 朗喺國家隊嘅表現遠不及球會，全因缺乏具質素嘅隊友配合，加輝認為西班牙有辦法令C 朗動彈不得。


雖然西班牙中場沙比阿朗素有傷在身，但估計都可趕及上陣，若然唔得都仲有法比加斯及查維馬天尼斯可以頂上。至於葡軍就有丹尼艾維斯受傷缺陣，迪高或會被雪藏，中場可能繼續起用堤亞高文迪斯。目前西班牙除費蘭度托利斯稍稍缺態外，其他正選都弗爆，相信西班牙今場可輕勝葡軍，一於簡單啲玩主勝。