施薩索拉斯力證森巴門將唔係垃圾

港陌

28/06/2010

要數巴西晉級英雄，有人話係法比安奴，有人話係艾蘭奴，但真正令一眾森巴巨星忘情進攻，其實係有賴佢哋嘅鋼門施薩索拉斯！曾被視為足球王國最弱一環嘅門將，如今已成為巴西爭勝嘅武器，雖受背傷困擾，施薩索拉斯都甘冒被國際足協處分，着住特製保護衣奮勇應戰，皆因佢要證明，巴西守門員唔係笑話！


經過喺國米漫長嘅三冠王球季，施薩索拉斯帶住沉重背傷出戰世盃，直到上仗鬥葡萄牙仲要畀魯爾梅利斯撞傷，一度令人擔心佢會就此傷出，甚至緣盡世盃，就連愛妻蘇珊娜都喺Twitter留言：「我有嘗試喺電視睇波給予佢支持，但我真係好擔心，唔敢再睇落去。」

足總力撐保護衣冇違規

好彩，只見巴西軍醫緊張咁為佢治療，咬緊牙關嘅施薩索拉斯又繼續為森巴兵團奮勇抗敵，雖然事後有唔少人質疑佢件保護衣有金屬配件，唔合國際足協規格，不過一樣無損施薩索拉斯嘅鬥志，巴西足總亦出言力撐，話個金屬配件其實只係個扣，已經得到球證批准。

默默耕耘淡然對讚揚

比利、薛高、朗拿度……巴西一向球星如雲，但從來只有進攻球員揚名立萬，首位被視作巴西世界級嘅門將，已經要數到1994年嘅泰法路，勉強啲嘅仲有迪達，但講到真正能夠上位成為全球最佳，就只有施薩索拉斯一人，就連經典門神哥高查同簡尼早前接受訪問，亦點名話佢先係當今最佳！


能夠吐氣揚眉，省靚巴西門將招牌，施薩索拉斯表示：「我唔會信佢哋，守門員好特別，今日你係世界第一，聽日可能全球最差。但我好高興，巴西門將唔係笑話，我哋要得到尊重！」展望今屆賽事，呢位國米門神希望隊友喺淘汰賽階段有更好發揮，實現唯一目標：贏取冠軍！

非常論戰

鄧加 巴西領隊

「對戰智利係一場重大嘅考驗，我相信喺卡卡同艾蘭奴復出嘅情況之下，巴西嘅表現一定會有改善。」

洛迪高米拿 智利中場

「經過分組賽之後，成班隊友都信心大增，巴西係世上最強隊伍，不過智利未驚過，更加唔會死守。」

睇非搵食

巴西熱唔透博細仲好

巴西嘅往績一直食住智利，單計近6次交手唔只全勝，仲總共入咗對方25球，有條咁嘅數據，傻嘅都知要買巴西啦，所以280萬早飛有9成係買佢哋，但係巴西個W並唔係我哋想像中咁熱，試過有段時間輕微向上，和波又有少少向下走添，森巴大軍今場波未必大炒，入球細有得諗。

(子貝)非球星

路爾斯法比安奴 （巴西前鋒）

披甲40場攻入27球，路爾斯法比安奴嘅入球率比朗拿度更高，係「森巴兵團」陣中最具效率嘅射手。呢位西維爾前鋒喺次輪分組賽對科特迪瓦梅開二度，演出光芒四射，為爭金靴獎殊榮今晚實搏老命。

阿歷斯山齊士（智利前鋒）

効力烏甸尼斯嘅阿歷斯山齊士，喺意甲球壇已經證明身價，呢位21歲射手雖然仲未喺決賽周開齋，但佢嘅腳下功夫、護球能力同速度都令球迷留下深刻印象，智利今鋪有冇得偷雞靠晒佢。

施薩索拉斯小檔案

出生日期：79年9月3 日

年齡\身高：28歲\1米86

國籍\位置：巴西\門將

効力球會：國際米蘭

今屆上陣次數\失球：3場\1球