維迪一戰成名恨返德甲搵食

港陌

28/06/2010

維迪要搵第二春！呢位斯洛伐克前鋒維迪上場對意大利梅開二度，一戰成名，現時以22個入球同前輩尼美夫並列國家隊神射手。由法甲里爾外借土耳其球會安卡華高古嘅佢，仲表明勁恨重返德甲聯賽搵食，故今場為己為國，都要爭取好表現搞掂荷蘭！

「贏到意大利使乜怕荷蘭」

現時28歲嘅維迪，喺17歲嗰年曾有機會加盟皇家馬德里，可惜最後因為膝傷告吹。曾經効力紐倫堡嘅佢喺今屆世界盃盡顯功架，是斯洛伐克除了咸錫以外，另一強勁武器。對於今晚對荷蘭，維迪話未驚過：「成隊都士氣高昂，我哋喺之前嘅比賽吸取咗唔少經驗，連上屆冠軍都贏到，今場有乜唔可能？」


原本維迪喺今年1月有望重返紐倫堡，可惜因轉會費問題未能成事，佢之前已講明好恨返德甲，幫自己搵第二春，故今場無論如何都會拚盡，期望吸引更多大球會注意。