尹佩斯儲3大球王合照

港陌

28/06/2010

荷蘭前鋒尹佩斯嚟到南非原來另有要務，就係要儲齊同3大球王嘅合照！一向唔鍾意追星嘅尹佩斯，向來都冇同名人影相嘅癮，但只有告魯夫、施丹同馬納當拿例外，佢話已集齊頭兩個人嘅合照，嚟緊就仲爭馬納當拿嗰張。咦，荷蘭要入決賽先會撞到阿根廷喎，唔通想暗示入決賽會硬撼阿根廷？

仲爭馬納當拿一個

呢個阿仙奴前鋒早前同著名歌手、有份喺開幕禮獻唱嘅Shakira喺酒店相遇，但就冇搵佢影相。不過，尹佩斯一見到前輩告魯夫同施丹，就即刻狂迷上身，好似個小Fans咁搵兩位球王影相，事後仲好得戚咁向記者大騷「戰利品」：「我諗得佢兩個我先會咁瘋狂，啊，仲有馬納當拿！」


如果尹佩斯想願望成真，嚟緊就要加倍努力，事關馬納當拿帶領嘅阿根廷喺另一邊線，想搵呢個球王合照似乎要雙雙入到決賽先有機會，但萬一阿根廷決賽輸波嘅話，唔知人哋仲肯唔肯同你玩影相呢？