史基倫堡拒做雲達沙二世

港陌

28/06/2010

「我唔要做雲達沙二世！」雲達沙係歐洲鋼門之一，不過現任荷蘭1號門將史基倫堡就話，唔鍾意啲人成日提起呢位前荷蘭國腳，原因係只要自己有乜犯錯，全世界就只識拎雲達沙嚟做比較，史基倫堡話要喺今屆世界盃打爭氣波，令球迷完全忘記「雲達沙」呢3個字！

一旦犯錯即被比較

雲達沙雖已退出國家隊，但好多球迷仍對佢念念不忘，仲話好想佢返出嚟把關，史基倫堡心入面自然唔多好受：「啲人會話如果雲達沙守呢球就唔會失喇，但我想講，我係我，雲達沙係雲達沙，唔好成日將我哋比較。」


其實史基倫堡喺3場分組賽只失過1球12碼，已代表荷蘭上陣30次嘅佢，近半年踢國家隊都相當稱職，亦令球迷漸漸忘記從前嘅雲達沙，呢位阿積士門將仲話，已視捧盃為目標，誓要脫離雲達沙嘅影子，成為新一代荷蘭鋼門。