巴西門神戴護背冇違規

港陌

28/06/2010

巴西門神施薩索拉斯因為背傷未愈，比賽期間需要戴住護背以防傷勢惡化。巴西足總發言人柏華表示，國際足協職員曾經檢查過佢嘅護背，認為並冇問題，加上沒有接到投訴，故不會禁止施薩索拉斯繼續使用。

FIFA驗過話OK

其實國際足協有規定，凡裝備會對其他球員造成傷害的話，球證及監場官員可禁止球員帶入球場。而施薩索拉斯就覺得護背令佢背部肌肉得到支持，可減少再受傷機會，唔覺得會對其他球員構成任何影響。


其實好多球員都會使用各式各樣嘅保護裝備，如科特迪瓦前鋒杜奧巴因手部骨折，於比賽期間要戴住金屬護甲。而前荷蘭國腳戴維斯亦曾因患上青光眼，故須戴上護目鏡出場。世界各地足總都對有關器具持寬鬆態度，相信施薩索拉斯仍可在餘下世盃上繫上護背比賽。