比爾沙魅力KO鄧加

港陌

28/06/2010

綽號「癲佬」嘅智利領隊比爾沙，性格執着，行事出人意表，同作風沉實嘅巴西領隊鄧加形成強烈對比，不過我行我素嘅比爾沙卻唔介意呢個惡名：「佢哋講得啱，我鍾意天馬行空，唔按常規辦事。」

前女總統都畀佢冧掂

不過呢位癲佬卻相當有魅力，當佢帶領智利取得世界盃外圍賽南美洲區亞軍後，智利球迷拉開橫額，寫住：「比爾沙，智利感謝你！」當智利首場分組賽擊敗洪都拉斯，取得四十八年來首場世界盃勝利後，全國更陷入瘋狂狀態！


智利前女總統巴切萊特承認係比爾沙嘅粉絲：「比爾沙英俊得來帶點神秘，而且好有修養內涵，實在好性感，我相信其他智利女性同我一樣，都會畀佢迷倒！」


比爾沙迷倒萬千少女，但「老實人」鄧加卻畀人彈佢形象又薯又老套，件西裝永遠衣不稱身，衣着品味勁差，不過鄧加卻懶得理：「我向來不拘小節，最緊要係取得好成績，形象對我嚟講唔太重要。」