智利喪砌巴西嫌命長？

港陌

28/06/2010

今晚十六強「南美鬥南美」，巴西硬撼智利。今屆世界盃防守足球成為主流，連向來崇尚進攻嘅巴西今屆都以防守行先，搞到成個賽事入球稀少，悶氣沉沉，令人慨嘆進攻足球已死。然而，智利領隊比爾沙卻係個徹頭徹尾嘅「癲佬」，話之你係地上最強定係魚腩弱雞，佢都堅持進攻。今晚智利硬撼五屆世盃冠軍巴西，竟然繼續高呼「不進攻、毋寧死」，誓要踢得「比巴西更巴西」，就算出局都無怨。估唔到有前冇後、打死罷就嘅進攻足球，竟然係借智利呢個小國身上「復活」！


（有線61台周二凌晨２時30分直播）

４３３全攻型陣式

阿根廷籍領隊比爾沙，外表睇正正常常，但卻有「癲佬」稱號，不但因為佢為了專注足球事業，堅決唔同老婆仔女住，只請個老工人返嚟煮飯；亦非因為佢為了隨時隨地研究戰術，連廁所亦安裝電視機播放足球錄影帶，係因為佢無論任何比賽，都堅持踢進攻足球，如果有高層壓力要佢放棄呢個理念，佢就會毫不猶豫劈炮唔撈。


九八年成阿根廷主帥，○二年小組出局，○四年雖取得奧運金牌，但佢仍請辭離場，就因為國內開始不信其攻擊戰術。蟄伏三年，比爾沙轉教智利，沒有大國勁旅包袱，佢癲得更勻循，大刀闊斧重用年輕球員，更大踢「３３１３」瘋狂進攻陣式。去到本屆世盃，雖然智利改踢番「４３３」，但進攻時十上十落，故往往出現六七個球員同時殺入對手禁區情況。


分組賽最後一戰鬥西班牙，其實智利打和就可首名出線，但比爾沙繼續擺大個頭猛攻，就算早早落後兩球、加上踢少個以寡敵眾，比爾沙仍叫球員壓上狂攻，最後不但令「鬥牛國」門前風聲鶴唳，更追回一球，雖然最後輸波，但表現仍受讚賞。

有前冇後打死罷就

比爾沙已成為智利人民偶像，有傳佢世界盃過後就會離隊，國內傳媒早已開腔望足總盡全力作出挽留，而上仗入球功臣洛迪高米拿都話：「智利為擁有比爾沙而驕傲，球隊可以殺入十六強，都係因為佢功力深厚！佢一直為智利人而戰，我哋唔可以冇咗佢。」

面對巴西，「癲佬」堅持進攻態度，並希望充滿血性嘅智利，可以拚死咬傷巴西，佢話：「打交有兩種人，一種係見到血就驚，之後收手離場；一種就反而可以激起鬥志，咬住對手唔放，戰鬥到最後一刻。智利今晚絕對唔會驚巴西，我哋要巴西試試鮮血滿身嘅滋味！」

要獎盃不要華麗 森巴足球變質了！

自鄧加接掌巴西帥印後，好多巴西名宿甚至傳媒都批評佢戰術保守，「醫生」蘇古迪斯就曾炮轟呢支森巴兵不知所謂，同八二年嗰隊差得遠，但作風強硬嘅鄧加卻堅持己見，更不惜棄用大細哨、柏圖、迪亞高同阿祖安奴等球星，就係為咗打造一支冠軍隊。

注重防守為贏冠軍

球員時代踢防守中場嘅鄧加，係巴西九四年嘅冠軍隊長，當時已經有好多人批評呢隊巴西係史上最悶。十幾年後鄧加試圖複製呢條方程式，結果近幾年巴西喺國際賽戰績彪炳，外圍賽首名出線，去年在洲際國家盃稱王。

鄧加認為進攻可贏得掌聲，但防守卻可贏得冠軍，所以佢執教巴西以來，一直強調防守同紀律，結果巴西近年嘅表現冇令佢失望，球迷亦開始接受佢呢套。今晚巴西嘅對手智利，則係由防守足球改踢進攻足球，步調正好同巴西相反，贏波嗰隊就可證明究竟進攻足球定係防守足球叻啲。