智利有料到 巴西難炒

港陌

28/06/2010
文： 肥叔

前晚世盃十六強頭兩場都精彩萬分，烏拉圭靠箭頭蘇亞雷斯射死南韓，呢啲真係贏級數，其實南韓今屆踢得唔錯，鬥志一流，即使提早畢業都雖敗猶榮。可惜見到南韓打得咁醒，又諗起中國隊，如果國足能夠踢到呢份鬥心，肯定唔使搞到連決賽周都入唔到。

加納愈踢愈醒要留意

前晚大戶賽前捧美國，不過，加納踢落完全唔輸蝕，結果令班博彩專家跌晒眼鏡。眼見銀行隊加納晉級八強，肥叔都好開心，呢隊波愈踢愈醒，同美國鬥足百二分鐘贏波，真係好嘢。嚟緊八強戰加納對烏拉圭，加納又畀人睇低一線，但絕對唔可以睇小佢哋。


今日繼續睇十六強賽事，南美大戰巴西對智利，巴西成一面倒熱門，足足讓到一球、球半，點讓啊！世盃參戰球隊實力渣極有個譜，去到十六強賽事差距更細，智利有本事逼到西班牙有氣冇碇抖，對住巴西都未驚過，佢哋多後生仔活力夠，絕對有力贏盤。


同日荷蘭對住斯洛伐克，初盤荷蘭要讓到球半，斯洛伐克能夠技術性擊倒意大利，表現絕對值得讚賞，今次對住荷蘭，佢繼續以穩守突擊戰術應戰，能否再爆冷就未知，但呢隻下盤大有機會開出。