荷蘭睇定食敲和主

港陌

28/06/2010
文： 笛子波童

今晚世界盃十六強頭場上演全歐洲對碰，荷蘭於德班市鬥巨人殺手斯洛伐克，斯洛伐克去仗憑體力、速度踢走老態畢露嘅意大利，今次面對當打嘅荷蘭冇咁易偷雞，但考慮到斯軍目前士氣、信心爆晒燈，荷蘭今屆又一反常態大打穩陣波，如果嫌1.33倍主W冇味，不妨敲3.5倍「和主」。（有線61台周一晚10時直播）


荷蘭今屆分組賽三戰全勝，晉級過程可謂未受考驗，但睇番「橙軍」頭兩場對丹麥及日本，都要等到下半場才打破悶局，表現慢熱，這點跟領隊雲馬維克排陣上較着重防守有極大關係。以往荷蘭全民皆攻，不過佢哋今屆進攻主要集中在前線鐵三角及中場史奈達，其餘兩名中場雲邦美及尼祖迪莊都係防守型球員，踢法明顯冇以前咁進取，去到淘汰賽階段更加唔會貿然搶攻。

洛賓留作後備殺手

洛賓上仗後備復出兼間接建功，傷勢已完全康復，不過領隊雲馬維克表示今仗有可能繼續將洛賓放在後備席，心態上留有一手，如果荷蘭上半場未能打破僵局，洛賓隨時再當後備殺手。

「橙軍」鬥快冇有怕

斯洛伐克上場能夠擊敗意大利出線，某程度上同對手出現嚴重老化好大關係，斯洛伐克踢法機動，快速反擊正好恰死年紀偏大嘅意大利，不過今次對手「橙軍」荷蘭平均年齡較輕，講速度亦唔輸蝕，斯軍要再次偷雞並唔容易。


波童認為荷蘭有力在九十分鐘解決對手，1.33倍主Ｗ係穩陣之選，如果想要較好分頭，可敲半全場「和主」，始終斯洛伐克剛戰擊敗上屆冠軍意大利，士氣及信心肯定比揭幕前更高，守到半場唔出奇。