智利大無畏

港陌

28/06/2010
文： 麥馬拿仁

今晚世界盃十六強爆發「南美內訌」，智利挑戰巴西。以波論波，「森巴兵團」當然秤先，但主W冇肉食，大盤分頭過兩倍更好路。巴西卡卡、羅賓奴同艾蘭奴復任正選，攻力毋庸置疑；智利一向攻強守弱，兼有兩名正選後衞停賽，兩軍近六交手全數開大，呢場可再追！（有線61台周二凌晨2時 30分直播）

對西班牙有辦你睇

雖然去到淘汰賽，大家一定謹慎啲，但智利自領隊比爾沙○七年帶隊後，就開始崇尚進攻足球。球隊採用全攻型陣式，選人亦側重球員攻擊能力，可以講係全民皆攻，依家貿然改變策略更唔划算。分組賽最後一仗鬥西班牙，雖然對手係「地上最強」，但智利亦照攻可也，上半場未打完已輸兩粒；而球隊少打一人後亦冇退縮，成功追番一粒開大，相信智利今晚會照攻巴西。


智利兩名正選後防龐斯同加利美度，對西班牙一仗分別領黃，已累積夠兩面黃牌坐波監，雖然伊斯美富迪斯同柏保路干查拉斯經驗唔曳，但活力同狀態遠遠不及兩名正選，再加上中場伊斯查達停賽，智利更加頭重腳輕，增加開大機會。

巴西主將抖夠復出

巴西於鄧加麾下，今屆繼續穩打穩紮，三場分組賽表現唔算特別標青，但已足夠於「死亡Ｇ組」出線。卡卡、羅賓奴、艾蘭奴今仗復任正選，大大增強球隊攻力，加埋弗到爆、隻手都識踢波嘅路爾斯法比安奴，「森巴兵團」進攻板斧多，面對智利後防缺口，入波絕對冇問題。其實呢對南美孖寶，以往對碰都係大盤保證，由○五年起六次對碰全數開大，當中只有一場係熱身賽，今戰大盤過兩倍要得過。