阿根廷蜘蛛俠「罷工」

港陌

27/06/2010
文： 重炮手

今屆世盃唔單止大部分賽事欠缺刺激，就連球員入波後慶祝方式都好平淡，無乜令人留下深刻印象嘅場面！例如阿根廷中場約拿斯古迪利斯以往入波都會帶上蜘蛛俠面具慶祝，但據佢自己所講今次嚟南非並無帶埋面具同行，想睇佢變蜘蛛俠怕且要等下次啦！


約拿斯古迪利斯以前効力馬略卡年代，就試過喺入波後戴起蜘蛛俠面具慶祝，原來呢個舉動同球迷要求有關：「有一次我去睇戲，有個小朋友走嚟同我講希望我幫佢入波，仲話自己最鍾意蜘蛛俠，所以我咪同佢講入波之後我會戴起面具嚟慶祝囉。」


可惜當記者問到約拿斯古迪利斯，會唔會喺決賽周再變身蜘蛛俠，佢就表示唔會：「我喺國家隊唔會變身㗎，所以我將自己買落嘅5個蜘蛛俠面具留喺紐卡素。」至於約拿斯古迪利斯點解拒絕變身，唔知會唔會同主帥馬納當拿有關呢？