|
27/06/2010
睇完早場「英德大戰」,沖個涼食個消夜,就好坐定定睇吓阿根廷可唔可以喺16強闖過埋墨西哥呢關。雖然今屆阿根廷大軍同86、90兩屆嘅實力仲有啲距離,捧唔捧到盃我唔敢講,但要搞掂墨西哥夠殺有餘!狠啲玩2.25倍「讓球主勝」!(有線 61及64、中央1及5台周一凌晨2:30直播)
阿根廷喺分組賽3戰全勝,而且表現一場比一場好,只不過龍門唔係哥高查、後防冇巴薩里拉、辛仙尼、辛尼迪,中場冇馬納當拿、列當度、施蒙尼,前線冇「巴迪高」同肯尼基亞,就硬係覺得今屆嘅陣容有啲不足。
分組賽全勝畀80分
慶幸經過自外圍賽以嚟嘅磨合,呢支阿根廷終於慢慢成形,睇番佢哋分組賽嘅表現,我會畀80分。第一場1:0贏尼日利亞係踢得較差嘅一場,畢竟係第一場波,美斯、希古恩狀態未係十足,華朗打中場貢獻有限,傳送欠奉,駁腳居多;後防演出亦騰騰震,只係尼日利亞更加流,先至冇出事咋。
第二場佢哋嘅表現就好好多,面對似模似樣嘅南韓,完全好似大人打細路咁,敵衞集中防範美斯嘅情況下,希古恩、泰維斯,甚至後備入替嘅阿古路都係得益者,大把空間騷「哥利」;中場換上麥斯洛迪古斯,比由華朗派牌更見侵略性。奈何迪米捷利斯繼續係防線上嘅計時炸彈,只係面對「太極虎」唔算太大考驗,總算可以過到骨。到咗最後一場因為篤定出線,對希臘派出多名二線兵依然夠殺,華朗似番一個中場指揮官,成條中場線生晒!不過據最新消息,馬納當拿今場未必用華朗,改由麥斯洛迪古斯擔正,提升隊波嘅行軍速度,中堅位亦派貝迪素取代「岩石」森美爾。
墨西哥射手輸卡士
至於墨西哥唔係唔好,喺分組賽嘅演出我會畀60分佢哋,但係一出線就遇上阿根廷,領隊艾古爾只好嘆一句黑仔囉!墨西哥第一場和南非1:1,如果唔係主隊後防大佬莫高拿犯錯,追唔追得番都成問題。第二場表現有所改善,冇錯,法國係臘肉,不足為患,但起碼墨西哥入到兩球,證明咗查維亞靴南迪斯嘅質素。最後一場雖然輸波,但我相信墨西哥球員當時係好清楚南非對法國嘅戰況,如果唔係,烏拉圭贏1:0嘅戰果應該會改寫。
查實,今場兩隊各有優劣,阿根廷有迪米捷利斯,墨西哥有馬基斯,兩個都係鍾意輕出但防守唔穩陣、齋贏身材之輩。只不過馬納當拿擁有令全球領隊眼紅嘅本錢,就係有6件不同類型兼有卡士嘅射手,呢樣係墨西哥比唔上嘅,只要阿根廷後防醒醒定定,要贏應該冇乜阻力。我反而覺得,假如墨西哥今場入波先,最後可能會輸得更慘,唔知大家同唔同意呢?
孭非球星
美斯(阿根廷前鋒)‧一個扭幾個
喺今屆世盃極之搶鏡,經常一個扭幾個,到依家仲未開齋完全係欠運。由於墨西哥踢法進取,相信今晚呢位擁有魔術般腳法嘅球星會有唔少射門機會。
奧蘇里奧(墨西哥後防)‧搶手右閘
早前同史特加約滿成為自由身,但隨住喺今屆世盃展現出色防守,傳聞已經有幾間西班牙球會睇中佢,呢名右閘亦講明希望繼續留喺歐洲發展,今晚Mark唔Mark到美斯將係關鍵。
非常論戰
托拉度(墨西哥中場)
「我哋今晚一定要打得聰明啲,唔可以亂,要多啲合作,盡可能避免賣弄個人技術。如果我哋做得到,呢場會係五五波,我哋有信心擊敗阿根廷。」
約拿斯古迪利斯(阿根廷後衞)
「我覺得馬納當拿唔想我哋做咁多花巧嘢表現自己。控制節奏不停搵空位先可以踢到好波,我覺得球隊依家絕對行啱方向。」
睇非搵食
阿根廷3戰全勝出線,計表現可以話係分組賽最Sharp醒嘅一隊,早飛有近480萬博佢哋W相當正常,雖有個水位見到有輕微波動,但係墨西哥W得20幾萬投注,水位臨到尋晚入夜開始向上,而且大部分莊家開嘅和波同客勝,都係高過平均值,博阿根廷勝係正路之選。
首球推介
雖然墨西哥隊長馬基斯賽前講明今晚一定要睇實美斯,但呢位阿根廷球星近況實在太弗,冇入波只係欠運,相信呢場係時候破入球荒,依家首球有成4倍值得熱捧,阿根廷一班後防喺今屆世盃輪流入波,次選不妨冷吼有29倍嘅軒斯。 |
|