德國士氣勁強攻三獅兵

港陌

27/06/2010
文： 阿占

世盃16強今晚先上演德國大戰英格蘭，英格蘭王牌朗尼冇料到，成隊波3場夾埋入2粒，況且一向老謀深算嘅日耳曼兵團開出每人5萬鎊贏波獎金，又有波歷克放料起英兵底，今場平手盤，阿占捧1.92倍嘅德國！（有線61及64、中央5台周日晚10:00直播）


英格蘭今仗抽到着紅色作客波衫，如果迷信啲講，佢哋今屆賽事一着紅衫就贏波，而且近5次着紅衫又冇甩拖，不過踢波係講實力，英格蘭開賽至今表現麻麻，3仗入得2粒，進攻非常唔掂！

晉級每人袋59萬

英格蘭班星一夾埋就冇料到，亦缺少好似荷蘭史奈達呢種打破悶局嘅球員，尤其係重心朗尼狀態差，要入8強難過登天。


反觀德國雖然喺分組賽輸過波，不過整體表現其實唔差，面對死對頭英格蘭，一眾具活力快速嘅新星將會係致勝關鍵，萬一兩軍處於膠着狀態，左路嘅馬高馬連、喺中路擅於遠射嘅奧斯爾，都有憑一己之力打開缺口嘅能力。仲有喎，德國特別公開宣布，如果班日耳曼戰將殺到入8強，每人即袋5萬鎊獎金（約59萬港元），球員肯定搏命。

舒韋恩史迪加復出

三獅兵今仗有加歷查停賽期滿，同傷愈嘅京治可以齊齊候命，但消息話卡比路會繼續用厄遜拍泰利，要知呢兩位仁兄轉身都慢，尤其係厄遜冇大賽經驗，肯定會成為英格蘭防線隱憂。


最重要嘅係，前隊長波歷克話晒泰利、林柏特同A高嘅弱點畀勒夫知，英格蘭今鋪危危乎！德國雖有卡卡奧腹痛缺陣、謝路美保定上陣成疑，但舒韋恩史迪加肯定復出，捧德國平手盤仲唔係坐走望贏？

孭非球星

湯馬士梅拿（德國中場）多才多藝

近年德國球壇冒起最快嘅新星，湯馬士梅拿踢法積極，喺場上不斷走位搵入波機會，加上入球觸覺敏銳，可謂前線殺手。事實上，佢可以兼任進攻中場、前鋒及翼鋒，令德國變陣更靈活。

迪科爾（英格蘭前鋒）三獅福星

把握力強係迪科爾最大特點，上仗對斯洛文尼亞首次出任正選，隨即一箭定江山，預計佢今仗會續受重用，拍住朗尼搵食。只係迪科爾亦有缺點，就係12碼不時宴客，所以卡比路千祈唔好搵佢做劊子手啦！

非常論戰

德國後衞拿姆：雖然論平均年齡，我哋德國真係好年輕，不過咪以為後生就承受唔到壓力，事實上我哋鬥志好頑強，所以唔會怕今場大戰。

英格蘭門將占士：我哋曾經喺08年以2:1擊敗德國，當其時嘅人腳同依家差唔多，所以我哋對今仗充滿信心，可以喺90分鐘內解決對手。

睇非搵食

德英各有捧場客

德國、英格蘭呢對冤家次次對碰，都打到日月無光，所以650幾萬早飛，都見到兩邊勢均力敵，德國W有280萬左右投注，但係水位出現微升，英格蘭嘅注碼亦差唔多，不過個價位相對平穩，約莫100萬買和，就一直壓住响低位，今場平手盤宜博英格蘭。

首球推介

英格蘭鋒力疲弱，玩首球宜向德國埋手。「王子」普多斯基喺世盃表現唔錯，而且走位靈活，應付泰利同厄遜呢類轉身較慢嘅中堅，隨時有着數，值得作為首球之選。至於湯馬士梅拿突破能力亦唔輸蝕，次選可以考慮。