英軍冇下次平手盤要捧

港陌

27/06/2010
文： 黃興桂

全球關注嘅世盃十六強世紀大戰德國對英格蘭，今晚開戰，Peter繼續緊守崗位同大家分析，英格蘭球員心血少，最害怕打加時，互射十二碼更會腳軟抽筋，因此英格蘭會用盡一切方法，在法定時間內解決對手，平手盤捧英軍！

九十分鐘唔贏好難贏

英格蘭一眾球星處於球員生涯黃金年齡，今屆再唔得，大部分球員都冇下次，因此技術及經驗均在巔峰嘅英格蘭可看高一線，德國今屆平均年齡較細，需要一段時間磨練及累積經驗，特別係頂級大戰嘅臨場應變能力。


不過若然英格蘭喺九十分鐘仍未能擊敗對手，出現和局，當進入加時及互射十二碼時情況將會逆轉，因為屆時心理包袱必成英軍負累，令球隊發揮唔到。


再講另一個話題，鄧加今屆拒絕重召「大細哨」朗拿度同朗拿甸奴，與納比堅持重用「大簡」簡拿華路，係兩種唔同類型思維，大細哨同大簡都經歷過風光時刻，高舉過大力神盃，然而今屆世盃踢完分組賽已得出結論：鄧加勝，納比敗。

鄧加用人叻過納比

巴西唔選大細哨，領隊鄧加更全力打造一支防守性踢法嘅巴西，令球隊森巴味道減弱，但結果巴西喺死亡Ｇ組順利以首名出線，穩穩陣陣；反觀意大利領隊納比，仍堅信簡拿華路係「世界最佳後衞」，信奉名牌，未有給予新人接棒，最終慘淡收場。

今日醒你

「荷蘭今屆成績好，皆因賴恩巴布係第23選擇！」雖然雲馬維克點兵時選咗賴恩巴布，當中或者有好多內情我哋外人唔了解，但只要一直唔出佢，荷蘭入八強問題不大！