支持英格蘭殺入八強

港陌

27/06/2010
文： 鍾溥敏－Mandy

前幾日終於有朋友仔陪我睇戲，黃真真拍嘅實驗電影真係好細膩，小故事串連而成嘅現實生活瑣碎事，並唔係一般愛情片用到爛嘅橋段，同我最鍾意嘅《我的野蠻女友》有得fight呀！睇到差唔多完我都仲係笑哈哈嘅，但係最後機場一幕我真係忍唔住……送機原來真係會咁傷心，我諗英軍上下都絕對唔想咁早就去機場。

德國骨幹太幼嫩

睇勻晒十六強秩序，「英德世紀大戰」絕對係最有睇頭戲碼，Mandy睇波年資淺，同Daddy傾開波經，先至知呢兩隊係世仇，支持德國嘅Daddy仲彈英格蘭射12碼水皮，贏波符碌，今鋪輸梗喎！不過說話就唔係咁講嘞！唔係話德國渣，不過奧斯爾、紐亞同謝路美保定呢堆骨幹咁幼嫩，大賽經驗唔夠，上次12碼又唔入，危啲囉！


Mandy知道英格蘭今屆嘅演出好多人都唔收貨，不過上場對斯洛文尼亞明顯踢出水準，成隊表現脫胎換骨。卡比路終於肯畀機會迪科爾同祖高爾非常明智，雖然小勝一球，但最重要係贏波大大增強英格蘭國腳嘅信心，球迷對佢哋都有番信心呀！Mandy認為「三獅兵團」可以喺法定時間搞掂德國，今次同Daddy打對台，唔好意思啦，平手盤你個女要英格蘭，加油呀謝拉特！大家最緊要今晚幫英格蘭打氣，撐佢哋殺入八強﹗