費城聯搬新竇響頭炮

港陌

27/06/2010
文： Mic少

周一凌晨至朝早有兩場美職聯賽，頭場費城聯主場對西雅圖海灣者。費城聯今仗將搬入位於賓夕凡尼亞州嘅新主場PPL公園球場比賽，勢必全力爭取打響頭炮。海灣者今季表現走晒樣，陣中傷兵人數頗多，作客更加惡唔出樣，平手盤捧費城聯。 （周一清晨5時開賽）


費城聯目前總成績包尾主要原因係賽程安排對佢哋不利，開季後十場有八場作客，長期四出征戰自然影響發揮。睇番佢哋之前借用林肯財經球場作為主場，都可以取得一勝一和，今次喺真正屬於自己嘅球場出擊，應該唔會失威。根據當地傳媒報道，有大量球迷將入場為費城聯打氣，屆時主隊氣勢必然更旺盛。

海灣者五虎受傷

海灣者今季表現乏善可陳，近四場聯賽輸咗三場，三位中場奧斯禾度阿朗素、華真拿斯、巴特伊雲斯、後衞祖漢靴達度及前鋒富薛圖都有傷在身未知能否落場，陣容極為不整下，作客睇怕又要輸多一場。


另一場新英倫革命主場對芝加哥火燄，革命今季贏波率只有百分之二十五，球隊最近簽下前鋒拉斯頓及中場卡奴史密夫增強實力，點知兩人都喺熱身賽同告受傷，今場幫唔到手，平手盤捧芝加哥火燄。