「英德」宿敵對決和波格

港陌

27/06/2010
文： SAMVO肥叔

前晚最後一日分組賽爭持激烈，西班牙成功首名出線，將會硬撼葡萄牙，呢場歐洲大戰夠晒矚目。世盃分組賽唔算好精彩，球隊畀形勢影響戰意，仲未打真軍，不過，去到淘汰賽階段輸波就冇得留低，嚟緊場場都係戲肉，一定好睇過戲。

智利醒神偷巴西雞

智利雖然輸畀西班牙，但踢落完全冇怯場，就算踢少個都追番球，輸波贏盤幫到手，不枉肥叔揀佢哋做銀行隊。智利十六強硬撼巴西，牌面睇當然唔及對手，不過，佢哋進步得好快，巴西亦唔係想像中咁犀利，早飛讓到一球、球半太多，呢隻下盤值得一試。


本來巴西大戰葡萄牙有機會成為今屆首個投注高峰，但因形勢所逼，場波變咗褪色大戰，直接影響走地投注額。今晚英格蘭大戰德國，呢場世紀大戰成為市場焦點，毫無懸念會製造今屆首個投注高峰，個人認為呢場波和波機會高。


「英德」對決極具吸引力，睇成績當然德國佔先，但近年英格蘭球圈發展愈來愈旺，造星能力遠勝德國。德軍勝在紀律好，雖然球員來自五湖四海，但國家觀念好，踢落都幾對辦。兩隊勢均力敵，今場法定時間隨時打和，有機會射十二碼分勝負。


同日阿根廷對墨西哥，阿根廷分組賽三戰全勝鋒芒畢露，咁快成為奪標熱門並非好事。墨西哥實而不華，受讓一球有利，呢隻下盤亦可兼顧。