阿根廷炒得起墨西哥

港陌

27/06/2010
文： 樂比堅尼

今晚世界盃十六強大戰阿根廷對墨西哥係上屆翻版戲碼。四年前阿根廷幾經辛苦，加時先擊敗墨西哥出線，但事隔四年阿根廷已經成熟咗好多，更難得係馬納當拿麾下大軍空前團結，墨西哥想偷雞好難咯！進取啲捧2.35倍「讓球主勝」。 （有線61台周一凌晨2時30分直播）


阿根廷同墨西哥係老對手，大家文化背景相近，同聲同氣，所以對雙方嘅踢法非常熟悉，兩軍歷史上交手過二十五次，墨西哥僅贏過四次，而且大部分都係上世紀嘅事，故墨西哥今次想爆冷可謂更加困難！

足球城球場阿軍福地

喺踢世界盃之前，所有人都睇淡阿根廷嘅機會，更大肆批評領隊馬納當拿唔選辛尼迪、甘比亞素及列基美等人，但分組賽嘅表現已證明佢選擇冇錯，因為阿根廷已經太多大牌球星，如果當中存在心病嘅話，好難發揮最佳水平，但到目前為止，阿根廷球員嘅精神面貌甚佳，依家全隊上下一條心，真係冇乜邊隊可以喺佢哋身上搵到着數。


阿根廷上仗對希臘收起部分主力，等球員養精蓄銳，上場贏完希臘之後，又畀球員放假休息，依家阿根廷無論生理同心理上，都處於極佳狀態，今場喺番上次大炒南韓嘅約翰內斯堡足球城球場舉行，有機會再上演入球騷，後衞森美爾受傷好大機會缺陣，將由貝迪素頂上，影響不大。反觀墨西哥出線甚為驚險，連搏幾場下，今場難有作為。

墨國過去4屆16強畢業

其實墨西哥唔係話唔好，但佢哋過去四屆世界盃都係十六強止步，歷史上最叻嗰兩次打入八強，都係靠主場之利，所以十六強出局嘅機會可以話高唱入雲。其實阿根廷唔係全無弱點，例如兩邊防線就唔係太穩陣，不過墨西哥踢法上同阿根廷太相似，球隊強調控球在腳，節奏太慢，根本冇機會給予阿根廷致命一擊，今場阿根廷主Ｗ冇肉食，不妨捧「讓球主勝」。

對戰史

日期 賽事 戰果（半場）

04/06/2008 熱身賽 阿根廷中勝4:1 (3:0)

11/07/2007 美洲盃 阿根廷中勝3:0 (1:0)

24/06/2006 世界盃 阿根廷中和1:1 (1:1)*

26/06/2005 洲國盃 阿根廷中和0:0 (0:0)**

10/03/2005 熱身賽 阿根廷中和1:1 (0:1)

11/07/2004 美洲盃 阿根廷中負0:1 (0:1)

註：*阿根廷加時贏2:1，**阿根廷十二碼勝6:5