撐德國踢英格蘭出局

港陌

27/06/2010
文： 蘇斯黑柴

世盃十六強淘汰賽，德國同英格蘭率先上演一場強者大戰，兩軍本世紀首次喺世盃決賽周相遇，立即要進行生死決。喺世盃展開前，黑柴都認為英格蘭前景好過德國，但經過三場分組賽後，對令人失望嘅英格蘭評級有必要下調，今仗面對德國未許樂觀。黑柴相信充滿朝氣嘅德軍有力踢走年老英軍，捧1.82倍德國晉級。


（有線61台周日晚10時直播）


英格蘭球星雖多，但林柏特、謝拉特同朗尼都欠缺狀態，相比起當起嘅德國毫無優勢，計門將、一對二閘同中場，德國嘅紐亞、拿姆、奧斯爾同基迪拉至今嘅表現都比英格蘭球員佳。德軍中場命脈舒韋恩史迪加因傷今仗多數缺陣，不過有危先有機，後備席上嘅卻奧斯係黑柴心目中嘅超級新星，計級數唔會差過上仗對加納爆發嘅奧斯爾，大賽經驗無疑不足，但佢嘅閱讀球賽能力同罰球妙技，隨時成為英軍催命符。


德國喺重要關頭從來都唔怕英格蘭，記得九○年世盃準決賽，兩軍踢成一比一平手，西德憑互射十二碼獲勝晉級，最後仲成功奪標。英格蘭該役表現出色，最終都係失望而回，當時射手連尼加賽後無奈咁話：「足球係一項由廿二人參與嘅遊戲，經過九十分鐘比賽，最終通常都係由德國人勝出。」呢句說話後來成為經典金句，至今流行足二十年，亦反映到德國每遇英格蘭都有心理優勢。

決賽周四次碰頭都和波

兩軍歷史上曾四次喺世盃決賽周碰頭，結果四次都喺九十分鐘內打成平手，當中三次淘汰賽相遇，德國有兩次晉級，唯一敗仗係六六年世盃決賽，當時英格蘭有主場之利，仲要加上一個問題球至加時險勝。睇數據，今仗除咗捧德國晉級，2.95倍嘅和波，亦可一敲。