鬥氣 鬥力 鬥爆 加納拗手瓜贏美國

港陌

26/06/2010

大家好！嚟到分組賽階段，亦係我《和坪飯店》南非分店開張嘅大日子！第一擊同大家傾吓美國對加納，呢兩支同樣係力量型嘅球隊，出線過程都峰迴路轉。喺今場鬥氣、鬥力、鬥爆嘅16強戰，我會睇高反擊較有效率，同個人技術好好多嘅加納拗贏對手，「黑星」受讓平半值博。（有線61及64、中央1及5台周日凌晨2:30直播）


由於要參與現場評述嘅工作，令我睇多好多場波，對於呢份新工作，我仍然係努力摸索當中，偶有閃失，希望各位多多包涵同指教。講番波，美國雖然係C組首名，但係做到呢組嘅「一哥」，唔係因為佢哋勁，而係英格蘭演出太差，加上斯洛文尼亞又唔爭氣，先至有運行啫。


睇番美國3場分組賽嘅表現，若果平均分係100分滿分、50分合格，我只會畀佢哋40分。事關首戰1:1和英格蘭，全賴對方全場不思進取，加上龍門羅拔格連彈得一手好琵琶，美國整體表現係鬥志十足，但論攻、守發揮只係一般。

美國戰術單調

第2場2:2和斯洛文尼亞，冇錯最後一球無厘頭畀球證判詐胡係冤枉，但全場對住獨沽一味反擊嘅對手，都要搞到落後0:2嚟踢，反映戰術單調、缺乏強攻本錢。最後一場對阿爾及利亞就更加不濟，能夠贏波全靠球員嘅努力而唔係實力，加上斯洛文尼亞嗰邊太過老定，驚險萬分先至出到線。環顧種種，實在不宜睇得美國太高。


加納都唔叻得去邊，但平均分我會畀佢哋合格嘅55分。第1場分組賽贏塞爾維亞，「黑星」防守做得唔錯，最後更靠十二碼贏1:0。次仗1:1和澳洲，最後唔輸係有運，但贏唔到亦都唔抵。

加納具個人突破能力

雖然加納最後一場輸畀德國，但全場見到佢哋有唔少反擊嘅機會，搞到班德國佬一仆一碌，進攻上可以靠組織，亦可以靠個人能力，阿休、蒙達利同基恩都有波底去自己搵食。相信如果唔係塞爾維亞喺另一場落後住嚟踢，加納係可以踢得進取一啲。

總括嚟講，今場兩隊實力接近，踢法相似，但我認為美國喺個人能力同鋒力都及唔上加納。平手我都唔會諗美國，何況依家仲要讓平半呢？支持「黑星」。

早飛少和波偏低博下盤

美國對加納，戲碼絕對講唔上吸引，自不然好難吸引到球迷提前落注，成場波只得70萬早飛，可以用可憐嚟形容。老實講，呢兩隊波真係半斤八両，美國頂龍只能夠秤先些少，和波水位長時間壓低，顯示打和機會唔細，美國要讓平半，博下盤加納好啲。

非常論戰

巴特利（美國領隊）

「相信大家都見識到美國球員嘅永不言敗精神，今場對加納亦都一樣，我哋會奮戰到底。」

彭素爾（加納後衞）

「非洲隊伍得加納生還，我肯定成個非洲都會為我哋打氣！贏美國？入決賽都仲得呀！」

孭非球星

當路雲‧花旗國救世主

美國能夠進身16強多得救世主當路雲，呢位「花旗國」No.1射手喺今屆決賽周盡顯功架，分組賽3戰攻入2球，上仗對阿爾及利亞幾腳妙到毫巔嘅傳送更加贏盡掌聲，今晚佢將會肩負攻擊重任。

阿休‧加納彈藥庫

現年20歲嘅阿休能傳擅射，腳下功夫更加係一流，可翼可鋒嘅佢喺國際隊專責打邊路，為單箭頭嘅基恩提供彈藥。阿休成功喺世界盃舞台證明實力。據講富咸、伯明翰同愛華頓幾支英超球隊已經對佢虎視眈眈，準備世盃後將阿休收歸旗下。

首球推介

美國上仗對阿爾及利亞嘥咗勁多機會，鋒將把握力幾弱，首入寧向踢法直接嘅加納球員埋手。單箭頭基恩射門欲強，有阿休同卡華禾艾沙姆兩翼提供彈藥，唔慌冇供應，可作首選。中堅莊拿芬文沙出擊力強，絕對係冷選佳品。