南韓兩大奇招打殘烏拉圭

港陌

26/06/2010

世盃16強大戰今晚爆發，先由烏拉圭決戰「太極虎」南韓！雖然烏拉圭嘅三箭頭強攻陣式發揮得唔錯，但面對南韓嘅整體打法，要闖入8強相信有一定難度，南韓晉級絕對唔係爆冷，博1.85倍「讓球客勝」啦！（有線61及64、中央5台周六晚10:00直播）

變形定位球+李雲在

雖然烏拉圭至今仍一球不失，不過睇番佢哋喺分組賽其實未遇到好大考驗，首場面對面目全非嘅法國，加上銳意死守，成功達到不失球目的；第二仗對南非可以講係冇難度，到第三場對最有威脅嘅墨西哥，其實競賽意味已經不大。烏拉圭前線似乎過於倚賴蘇亞雷斯同埋科蘭，中場迄今未曾取得入球，反映中場攻擊力不足。況且暫時外圍都只係烏讓半球，莊家開得比較保守，唔敢讓太多，似乎有隱憂！

行軍迅速入球分布平均

南韓自2002年後，今屆再次以整體打法殺入16強，足證南韓實力比起烏拉圭可能更平均。「太極虎」行軍快速，紀律性又強，話唔定可以喺中場抑制對手。講到攻擊，其實南韓嘅入球能力絕對唔失禮，分組賽入球量仲多過烏拉圭，中前場有李青龍、朴智星等高質球員，憑佢哋快速入楔打法、死球戰術，令入球分布平均，好似朴主永上仗直射罰球建功，就係最佳例子。主帥許丁茂賽前都講明會繼續用死球搵食，仲話有一招「變形定位球」添，聽講主要係用李榮杓前插偷雞，令烏拉圭防不勝防咁話。

互射12碼即換李雲在

事實上，南韓早就準備用12碼同烏拉圭決生死，據佢哋個姓金嘅助教放料，呢場波如果要玩俄羅斯輪盤決勝，「老大哥」李雲在就會登場，原因係法定時間比賽同互射12碼時龍門要求唔同，120分鐘內要個龍門反應敏捷，爆發力強，用鄭成龍比較適合，但係12碼階段，經驗有助捉路，李雲在會係不二人選，所以「太極虎」到時可能換龍門云云。先唔理呢單料堅定流，南韓似乎判死都要搏喺法定時間唔輸波，受讓真係有得諗。

和波下調太極虎頂得住

烏拉圭响往績佔優，3次對戰未輸過畀南韓，但係由嗰150幾萬早飛睇，雖然烏拉圭W嘅佔咗八成多，不過水位唔見下壓，反而仲見到輕微上揚添，加埋和波價位平穩向下，南韓有機會頂住90分鐘唔輸，買1.85倍「讓球客勝」合理啲。

孭非球星

蘇亞雷斯（烏拉圭前鋒）豪門獵物

上仗對墨西哥嘅分組賽最後一戰，頂入自己喺決賽周首個入波，無疑令蘇亞雷斯信心大增，其實佢一早喺阿積士踢到曉飛，以佢嘅質素，絕對有能力爭取更多入球，再加上盛傳佢受到英超球會熱刺青睞，相信會激發起佢嘅鬥志，令佢喺嚟緊賽事大顯身價，繼續發威！

李青龍（南韓中場）右路飛龍

叫得做「雙龍」之一，李青龍出名技術同鬥志都咁好，加上喺効力英超保頓嘅日子，令佢磨練出更好嘅身體對抗同應付高空波能力，依家佢可以話係南韓右路嘅必然正選。值得一提，李青龍場上表現冷靜，由佢喺對阿根廷一仗，偷走迪米捷利斯腳下球兼入埋就知啦！

非常論戰

烏拉圭領隊泰巴尼斯

我哋睇番呢幾場波嘅影帶，發現南韓攻擊就真係幾好，不過防守方面就有好多不足之處，對尼日利亞都要失兩球，我哋只要把握得好，贏波晉級唔係難事。

南韓中場朴智星

雖然我哋已經殺入16強，不過我哋係南韓，所以唔會就此滿足，嚟緊嘅每一場比賽都係淘汰賽，因此我哋有必要更加努力，希望能夠爭取更好、令國民滿意嘅成績。

首球推介

南韓後衞李正秀喺今屆世盃展現助攻力強嘅特點，唔講唔知原來佢係現時隊中神射手，旺到咁首球值得捧吓佢場！至於烏拉圭射手科蘭同樣有兩球進帳，加上佢要力爭神射手，鬥心強次選可揀。