藍色雙熊同病相憐

港陌

26/06/2010
文： 黃興桂

法國前腳剛走，意大利後腳已跟上，這兩支藍衫軍竟在相同情況、相同遭遇下被踢出局，其背景、分組賽經過，以及出局過程如同餅印，兩支以藍色為主嘅球隊，齊齊Singing the Blues，相當慘情。


意大利同法國一樣，遇上青黃不接問題，多位主力高峰期已過，「世界最佳後衞」簡拿華路嚴重退化，前鋒伊亞昆達亦非世界級前鋒，球隊亦曾傳出內訌及不和問題，上屆冠軍以如此方式在分組賽後執包袱，球迷或會覺得可惜，但在 Peter心目中係意料中事。意大利同法國都以藍色為主色，意大利外號Azzurri，而法國外號Le Bleu，兩個稱號都係解作藍色團隊，而兩隊今屆遭遇竟然驚人地相似，可謂同病相憐。

史奈達馬爾干閃耀世盃

睇世界盃係要向前望，意大利的確出產過好多偉大球員，但係迪比亞路、托迪等球星，已經係上一代嘅球員，足球場好現實，緬懷過去係踢唔到好波。今屆有邊位新人值得睇，Peter隨便講兩個，荷蘭嘅史奈達同巴西嘅馬爾干，呢兩個都係當今最佳球員，大家要慢慢欣賞。


十六強今晚開始，經過分組賽第三輪角逐，進入淘汰賽階段，各隊踢法又會回復小心謹慎，每個入球價比千金，因此投注重心宜偏向細盤。

今日醒你

「Dejavu！」廣東話讀音為「地渣烏」，這個字是法文，在e及a兩個字母上有一小撇，但英文亦常用，意思為「似曾相識」，已故好友尹佬最鍾意用這個字，今屆世盃法國同意大利命運相同，真係Dejavu！

「金句王」黃興桂

重回香港評述

世界盃，戰術、技術、金球

同你句句金。