銀河缺雙箭細成騎虎

港陌

26/06/2010
文： Mic少

明早有五場美職聯賽，目前總成績最佳球隊洛杉磯銀河將作客ＦＣ多倫多，銀河喺世界盃揭幕前最後一場聯賽，被皇家鹽湖城打破今季不敗身，球員難免洩氣，加上兩位射手當路雲及艾臣布度仍然喺南非踢世界盃，要攻破ＦＣ多倫多大門並唔容易，今場捧入球細。


（now 633周日早上７時30分直播）


銀河今季表現超班，聯賽勝出率達七成七，積分亦遠遠拋離對手，但一支球隊要長期保持佳態非常困難。銀河上輪輸畀皇家鹽湖城，士氣被打窒，隨時成為球隊轉捩點，特別係缺少兩位射手當路雲及艾臣布度，要克服逆境贏波就更加困難。不過，銀河今季後防極之穩健，踢十三場聯賽只係失四球，所以今仗就算入唔到波，亦唔會畀對手得逞。

ＦＣ多倫多主場頂得住

ＦＣ多倫多今季有好大進步，當中五次主場取得四勝一和，絕對有力同銀河抗衡。事實上，ＦＣ多倫多防守力亦相當強，近四場聯賽只失一球，包括上月中作客同銀河打和○比○，今次再對壘相信情況分別唔大，再追多鋪細。


另外，美國芝華士主場對ＦＣ達拉斯，雙方近七次交手全部開細，再追。侯斯頓戴拿模不設防，三連敗共失九球，今仗主場對科羅拉多急流，可捧客勝。