加納偷襲美軍

港陌

26/06/2010
文： Mic少

今晚世界盃十六強尾場，美國大戰「黑星」加納，美國能夠以C組首名出線，並非因為表現好，只係同組種子隊英格蘭失準。事實上，美國整體實力平庸，加上來到淘汰賽階段，對賽雙方難免會比較保守，隨時打加時，甚至以互射十二碼分勝負，讓波一隊非常蝕底，建議捧受讓平半嘅加納下盤。 （有線61台周日凌晨2時30分直播）

防守勁隨時打加時

今屆決賽周嘅六支非洲球隊之中，加納表現最對辦，踢法四平八穩，尤其係一條防線彭素爾、文沙、莊拿芬文沙及沙比都喺歐洲主流聯賽搵食，大戰經驗豐富，上仗同德國交手，演出並唔失禮，而且勝在夠爛打，最後只係失一球，美國要攻破其大門，恐怕相當困難。


防線穩健對踢淘汰賽非常重要，只要唔失波就可以叫胡，大不了互射十二碼分勝負。因此，加納今仗大可以繼續沿用最擅長嘅穩守突擊戰術同美國抗衡，要頂住九十分鐘唔輸，相信問題不大。

美國讓波要唔過

另一邊廂，美國表面上分組賽不敗，但出線過程欠說服力，逼和英格蘭一役，全因對手門將羅拔格連發波瘟「彈琵琶」，次仗對斯洛文尼亞，更一度落後兩球，最後一場更係補時才取得入球險勝阿爾及利亞，每場都踢得好艱苦，根本冇讓波本錢。


值得一提，雙方曾於上屆世界盃分組交鋒，當時加納贏二比一，即使加納今屆缺少艾辛，但實力不在美國之下，受讓平半下盤抵玩。