烏拉圭惡細力橫行

港陌

26/06/2010

世界盃十六強今晚開波，烏拉圭於曼德拉灣球場決戰南韓。南韓級數輸蝕，加上後防慌失失，單靠鬥志唔夠烏拉圭砌。烏軍於老帥泰巴尼斯領軍下踢法機動，分組賽零失球，進攻鐵三角又有料到，攻守兼備值得信賴，不過從分組賽表現所見，該隊領先下都大歎慢板，蘇豪認為細盤更穩！ （有線61台周六晚10時直播）

南韓防線甩漏多

南韓成功殺入十六強，當然士氣如虹，領隊許丁茂仲話球員未滿足，希望取得更佳佳績。不過南韓防線存在弱點，陣上甩漏甚多，上場如非尼日利亞自己唔爭氣，南韓已經輸埋出局，今次遇上烏拉圭條恐怖鋒線未必頂得住。


烏拉圭今屆演出令人眼前一亮，攻守同樣咁醒，後防於盧根奴領導下密不透風，分組賽三戰保持清白之身，雖然對手法國、南非同墨西哥鋒力都唔算特別勁，但南韓都唔係叻，相信都頂得住。前線方面，射手科蘭第二場對南非梅開二度，另一箭頭蘇亞雷斯上場亦開齋，兩人同樣有質有態，演出對辦。

烏拉圭往績秤先

烏拉圭演出咁醒神，教頭泰巴尼斯應記一功，呢位老帥戰術靈活到不得了，經常因應形勢變陣，進攻時踢三五二或四四二，主守時甚至踢五三二，仲巧妙地安排星級前鋒科蘭墮後策動攻勢，前面由卡雲尼同蘇亞雷斯拍住攻堅，呢個進攻鐵三角威力夠晒強。


雖然烏拉圭技高一籌，不過蘇豪對細盤更有興趣，皆因從分組賽表現所見，烏拉圭領先南非及墨西哥後均大歎慢板，並冇施以快速突擊搵「燕梳球」，對防守非常有信心，如果唔係南非尾段散晒，烏拉圭難以在補時贏到三比○。


南韓比南非較有隊形，相信唔會出現類似情況，細盤值得捧場。另外翻查往績，兩軍近四次交手南韓輸晒，包括九○年世盃分組賽，烏拉圭完場前頂破南韓出線，可謂剋死太極虎。

對戰史

日期 賽事 戰果（半場）

24/03/07 熱身賽 烏客勝2:0（2:0）

08/06/03 熱身賽 烏客勝2:0（1:0）

13/02/02 熱身賽 烏主勝2:1（1:1）

21/06/90 世界盃 烏中勝1:0（0:0）