瑞士搶得失球撕碎洪都拉斯

港陌

25/06/2010
文： 重炮手

今晚世盃H組會爆發名副其實嘅攻防戰，事關瑞士能否晉級好大機會取決於得失球，所以領隊希斯菲特亦一早落晒柯打要狂攻。至於出線無望嘅洪都拉斯亦會死守想攞得今屆嘅第1分，問題係佢哋防線欠穩怕且頂唔住，瑞士W可以捧場！（有線63及中央 1台周六凌晨2:30直播）


現時H組形勢相當微妙，因為打埋最後一輪比賽之後，好有可能出現西班牙、智利及瑞士各得6分嘅情況。由於同分先計得失球差決定邊隊晉級，所以對瑞士嚟講相當輸蝕，主帥希斯菲特亦一早計到，早喺賽前表明要入多啲波，免得到時因為得失球差及唔上其他隊伍而被迫出局！

擅長整體戰

事實上，瑞士雖然一路畀人守強攻弱嘅印象，但睇番對上兩場分組賽，就會發現佢哋都可以組織到有威脅嘅攻勢。若非戴迪約克先喺對西班牙射中柱，再喺智利一仗空門失機，瑞士依家都唔止得3分咁少。無可否認，瑞士有中場比哈美停賽，中堅辛德路斯又養傷，但呢班波向來打整體戰，實力唔會因此而減弱。

洪都拉斯換邊前例失波

至於兩戰皆北嘅洪都拉斯，基本上出線機會渺茫，但如果輸埋今仗又實在太難睇，心態上好可能大打守勢波，希望攞番1分向球迷交代。只不過洪軍本身唔爭氣，兩場分組賽都係換邊前就輸波，多少反映防線未達世盃級數，對住話晒歐洲二線嘅瑞士睇怕都係咁大！

非常論戰

雲貝根‧瑞士後衞


「我哋對上場嘅紅牌判決好憤怒，但只要我哋擊敗洪都拉斯，仍然有好大機會出線。」

魯達‧洪都拉斯領隊

「我哋數字上仍然有些微機會晉級，所以大家唔會放棄，會繼續爭取好成績。」

孭非球星

巴尼達（瑞士中場）側擊好手

曾經代表瑞士奪得U17歐國盃冠軍，巴尼達往往喺右邊提供大量傳中波及射門，所以佢喺隊中作用相當重要。加上另一邊線球員比哈美停賽，睇嚟佢今仗要孭起成條右路嘅攻勢。

蘇亞素（洪都拉斯前鋒）入球希望

洪都拉斯以反擊作為主要進攻方式，令快速嘅蘇亞素表現更加如魚得水，所以佢喺外圍賽上陣11戰射入4球，成為領隊魯達愛將！現時洪都拉斯喺決賽周仍然未有入波，蘇亞素需要再加把勁，為球隊開齋！

睇非搵食

瑞士想入16強，唯一希望係大炒洪都拉斯，然後等西班牙、智利是但一隊出事。基於呢個原因，大部分早飛都係買瑞士贏波，買洪都拉斯W、和波加埋都唔夠7萬，仲要猛咁升水，瑞士呢鋪有望贏兩球以上，博2.25倍讓球主勝啦！

首球推介

雖然瑞士以穩守為主，但反擊速度唔差，兼且有一定組織能力，有利前鋒阿歷山大費爾搵食，加上佢喺隊中卡士叫最高，唔揀佢揀邊個？至於洪都拉斯射手蘇亞素可作次選，因為對方中堅辛德路斯養傷，今佢有機可乘。