西班牙晒冷智利好牙煙

港陌

25/06/2010
文： 朱楓

雖然智利頭2場分組賽全勝，不過今晚喺H組最後一場對住西班牙，隨時大敗兼晚節不保，事關佢哋即使有2名主力停賽，仲夠膽死話今場要繼續踢進攻足球，適逢「鬥牛兵」有主力恩尼斯達傷愈，費托同韋拿都表明會打爭氣波「贖罪」，「讓球客勝」有2.15倍絕對玩得過！（有線61、64及中央5台周六凌晨2:30直播）


目前H組4隊都仲有出線機會，當中智利今場只要和波就肯定出線，但如果輸畀西班牙，就可能出現三隊同得6分情況，到時就要計得失球定名次。不過大熱門西班牙今晚一定會以大勝為目標，事關如果以H組次名出線，喺16強好大機會要硬撼大熱門巴西。

恩尼斯達傷愈上陣

相比首場意外不敵瑞士，西班牙上場對洪都拉斯表現明顯有改善，不過梅開二度嘅射手韋拿喺比賽中被影到用手摑對方後衞，一度傳會被罰停賽7場，好彩國際足協事後表明放過佢，相信韋拿今場應該會用入波「慶祝」。另外費托上場頻頻嘥「餐士」，賽後佢話勁瘀皮，希望今晚入波補數挽回聲譽，加埋恩尼斯達經已傷愈復任正選，西班牙一貫水銀瀉地進攻，相信今晚可以重現大家眼前！


先後擊敗洪都拉斯同瑞士嘅智利，雖然今場有中場卡路士卡莫拿同馬迪亞斯費南迪斯累積2張黃牌自動停賽，但隊長兼龍門哥迪奧巴禾賽前仍表示，球隊今場唔會改變一貫主攻踢法，但睇番數據，呢支南美洲球隊頭兩場全隊加埋射咗40次門，係32強之中第3多，但都只係入得2球，反映埋門把握力極之曳，再睇埋佢哋史上7次對西班牙輸足6次，呢場鬥攻真係隨時渣都冇得剩！

非常論戰

龐斯‧智利後衞


無論熱身賽定練波分組賽，我哋從來冇改變過主攻踢法。我哋領隊亦從來唔會同我哋講為和而戰，因為咁樣反而仲綁手綁腳。

恩尼斯達‧西班牙中場

智利今屆表現好突出，相信今晚係一場好激烈嘅賽事。我哋一定會做到最好爭取出線，首要條件係爭奪控球權。

孭非球星

麥克干沙利斯（智利中場）速度見稱

南非出生嘅智利國腳，以速度見稱。曾効力利物浦嘅佢，上兩場後備入替都有唔錯表現。由於智利今晚有2名中場停賽，麥克仔今晚好大機會以正選上陣，即管睇吓佢仲有冇料到！

恩尼斯達（西班牙中場）技術上乘

首仗輸畀瑞士唯一發揮正常嘅西班牙球員，技術上乘，話過就過，抖咗一場後今晚應該會復出，相信可大大增加西班牙前線嘅創造力，贏唔贏到波靠晒佢！

睇非搵食：智利W係咁升

西班牙贏唔到智利就可能要執包袱，今場波肯定去到盡，早飛亦見到買西班牙W嘅投注同樣去得好盡，成場波400萬有380萬係買「鬥牛勇士」，搞到智利個W不斷上升。不過，和波走勢只係平穩向上，西班牙小勝唔奇。

首球推介

雖然上場射失12碼，但能夠梅開二度，證明韋拿有一定狀態。事實上，韋拿仲差5球就可追平魯爾喺國家隊嘅入球紀錄，為咗名留青史，呢場肯定努力爭士哥。至於次選就可以揀呢幾場頻頻上前助攻嘅後衞沙治奧拉莫斯。