鹽湖城地頭出擊唔怕地震

港陌

25/06/2010
文： 力奇

世界盃雖然仲打得如火如荼，不過美職已急不及待喺周末重開，聽朝搶先上演將會係皇家鹽湖城主場鬥聖荷西地震，力奇睇好1.57倍主W，事關鹽湖城喺主場已經連續20場未輸過，加埋上周日先踢過熱身賽，相比起久疏戰陣嘅地震肯定佔優。（開賽時間：周六早上9:00）

聖荷西地震久疏戰陣

鹽湖城今季憑住穩定演出，排名僅次於銀河。最犀利係佢哋喺里奧天圖球場威力強大，主場連續20場不敗，之前連榜首嘅銀河都喺度輸0:1，橫睇掂睇，近3場只得1和2負嘅地震都唔似偷到雞。


為咗保持狀態，鹽湖城上周日就約戰咗哥斯達黎加球會普塔雷拿斯拍跳，結果輕勝2:0，全場射門比較係22:1，形勢一面倒，反而聖荷西地震就掛住睇世界盃，足足休戰20日。


人腳方面，鹽湖城雖有中場碧卡文養傷，前鋒芬特尼亦備戰緊世盃，但後者今季只入一粒，作用唔大，最緊要係兩大殺手哥斯達黎加嘅沙保里奧同阿根廷嘅艾斯賓杜拿喺度撐場，要贏波話咁易啦！